, दाङ। महिला जेसिजले ‘बुँदादेवी गोराथोकी उत्कृष्ट महिला पुरस्कार वितरण–२०२६’ कार्यक्रमका लागि पत्रकार सम्मेलन गरी विभिन्न क्षेत्रमा उल्लेखनीय योगदान पुर्याउँदै आएका महिलाहरूलाई आवेदन दिन आह्वान गरेको छ।
दाङ महिला जेसिजकी अध्यक्ष अर्चना शर्माको अध्यक्षतामा सम्पन्न पत्रकार सम्मेलनमा नेपाल पत्रकार महासंघका केन्द्रीय सचिव सबिन प्रियासन प्रमुख अतिथि तथा नेपाल पत्रकार महासंघ दाङ शाखाका अध्यक्ष सन्तोष सुवेदी विशिष्ट अतिथिका रूपमा सहभागी हुनुहुन्थ्यो। कार्यक्रमको सहजीकरण महासचिव बसन्ती सुवेदीले गर्नुभएको थियो।
पत्रकार सम्मेलनमा दाङ महिला जेसिजले आगामी १५ दिनभित्र विभिन्न क्षेत्रमा सक्रिय रही समाजमा सकारात्मक योगदान पुर्याएका महिलाहरूलाई आवेदन दिन आग्रह गरेको छ। प्राप्त आवेदनहरूमध्येबाट योग्य तथा योगदानका आधारमा महिलाहरू छनोट गरी पुरस्कार वितरण गरिने जानकारी गराइएको छ।
कार्यक्रमका प्रमुख अतिथि सबिन प्रियासनले महिलाहरूको योगदानको पहिचान, सम्मान र प्रोत्साहनले समाजमा सकारात्मक परिवर्तन ल्याउन महत्त्वपूर्ण भूमिका खेल्ने बताउनुभयो। उहाँले भन्नुभयो, “समाज परिवर्तनको अभियानमा महिलाहरूको भूमिका अत्यन्त महत्त्वपूर्ण छ। घरपरिवारदेखि सामाजिक, आर्थिक, शैक्षिक, राजनीतिक, साहित्यिक, व्यावसायिक तथा विभिन्न नेतृत्वदायी क्षेत्रमा महिलाहरूले पुर्याएको योगदानको उचित मूल्यांकन हुनुपर्छ। यस्ता पुरस्कारले योगदान गर्ने महिलाहरूलाई थप ऊर्जा र प्रेरणा प्रदान गर्छन्।”
उहाँले पुरस्कार वितरणलाई औपचारिकतामा मात्र सीमित नराखी वास्तविक रूपमा समाजका लागि उदाहरणीय काम गरिरहेका महिलाहरूको पहिचान गर्ने माध्यम बनाउनुपर्ने धारणा राख्नुभयो। साथै, सञ्चार क्षेत्रले पनि महिला प्रतिभा र उनीहरूका सफलताका कथालाई प्राथमिकताका साथ सार्वजनिक गर्नुपर्ने बताउनुभयो।
विशिष्ट अतिथि नेपाल पत्रकार महासंघ दाङका अध्यक्ष सन्तोष सुवेदीले महिलाहरूको क्षमता, सिर्जनशीलता र सामाजिक योगदानलाई उजागर गर्न यस्ता सम्मानका कार्यक्रम प्रभावकारी हुने बताउनुभयो। उहाँले पुरस्कारका लागि छनोट प्रक्रिया निष्पक्ष, पारदर्शी र योगदानमा आधारित हुनुपर्नेमा जोड दिनुभयो।
अध्यक्ष अर्चना शर्माले दाङ महिला जेसिजले महिलाको नेतृत्व विकास, क्षमता अभिवृद्धि र सामाजिक योगदानको सम्मानलाई प्राथमिकतामा राख्दै आएको बताउनुभयो। उहाँले विभिन्न क्षेत्रमा क्रियाशील महिलाहरूलाई अवसरको सदुपयोग गर्दै निर्धारित समयभित्र आवेदन दिन आग्रह गर्नुभयो।
दाङ महिला जेसिजले ‘बुँदादेवी गोराथोकी उत्कृष्ट महिला पुरस्कार–२०२६’ मार्फत समाजमा सकारात्मक योगदान पुर्याउने महिलाहरूलाई पहिचान गरी सम्मान गर्ने लक्ष्य राखेको जनाएको छ।
