बाँके । सशस्त्र प्रहरीले मात्र चेकजाँच गर्दै आएको उक्त चोकमा सशस्त्र प्रहरी सँगै नेपाल प्रहरीले पनि चेकजाँच सुरु गर्न थालेको हो ।
एकिकृत जाँच चौकी (आइसीपी) र जमुनाहबाट आउने सवारी साधन तथा मालबाहक गाडीको चेकजाँच गर्न सोमवारदेखि नेपाल प्रहरी पनि परिचालन भएको जिल्ला प्रहरी कार्यालय बाँकेका प्रहरी प्रमुख एसपी अंगुर जिसीले जानकारी दिए ।
चौलिका चोकमा खटिने सशस्त्र प्रहरी र नेपाल प्रहरीको कामका दायरा किटान गरिएको उनले बताए । ‘नेपाल प्रहरीले लागु औषध तथा साना हातहतियार सम्बन्धि चेकजाँच गर्नेछ । सशस्त्र प्रहरीले अवैध रुपमा भित्रिएका सामानको चेकजाँच गर्ने गरि जिम्मेवारी दिइएको छ,’ उनले भने । आइसीपीबाट आउने सवारी साधन तथा मालबाहक गाडीबाट लागु औषध र साना हातहतियार भित्रिने खतरा बढेपछि इलाका प्रहरी कार्यालय जयसपुरलाई चौलिका चोकमा चेकजाँच गर्न परिचालन गरिएको एसपी जिसीले बताए । ‘सशस्त्र प्रहरीलाई अवैध सामान चेकजाँच गर्ने अधिकार छ । लागु औषध तथा साना हातहतियार चेकजाँच गर्ने अधिकार नेपाल प्रहरीलाई भएकोले सीमा प्रहरी चौकीलाई परिचालन गर्न परेको ईलाका प्रहरी कार्यालय जयसपुर सिमा प्रहरीका प्रमुख इन्चार्ज वरिष्ठ सइ बिष्णु गिरीले बताए ।
लागु औषध र साना हातहतियार नियन्त्रणका लागि नेपाल प्रहरीलाई परिचान गरेको छ । लागु औषध नियन्त्रण गर्न र आइसीपी भएर साना हातहतियार रोक्न प्रहरीलाई चौलिका चोकमा परिचालन गरिएको भने ।
यसअघि पनि चौलिका चोकमा इलाका प्रहरी कार्यालय जयसपुरले छड्के चेकजाँच गर्दै आएको थियो । उक्त समयमा आइसीपीबाट सवारी साधन तथा मालबाहक गाडी आउन सुरु भएको थिएन । ‘आइसीपीबाट आउने सवारी साधन र मालबाहक गाडी चेकजाँच नहुने हुँदा लागु औषध तथा साना हातहतियार भित्रिने सम्भावना बढेपछि नेपाल प्रहरीलाई परिचलान गर्ने निस्कर्षमा पुग्यौँ,’ एसपी जिसीले भने ।
चौलिका चोक क्षेत्रमा चेकजाँच कार्यलाई थप व्यवस्थित बनाउन इलाका प्रहरी कार्यालय जयसपुरबाट प्रहरी टोली परिचालन गरिएको छ ।
नेपाल प्रहरीले साना तथा मालबाहक गाडीलाई एक–एक गरि चेकजाँच रहेको एसपी जिसीले बताए । ‘लागु औषध तथा साना हातहतियारमा निगरानी गर्न निर्देशन दिइएको छ ।
नेपाल प्रहरीले अवैध सामान नियन्त्रण गर्न सशस्त्र प्रहरीलाई सघाउने र लागु औषध तथा साना हातहतियार नियन्त्रणमा सशस्त्र प्रहरीले नेपाल प्रहरीलाई सघाउने भएको छ । ‘दुवै प्रहरी संगठनले एक अर्कालाई सघाउने सहमति भएको छ,’ एसपी जिसीका अनुसार ‘संयुक्त चेकजाँचले अवैध सामान र लागु औषध तथा साना हातहतियार भित्रिने क्रमलाई तत्काल रोक्ने आशा गर्दै नेपाल प्रहरी र सशस्त्र प्रहरीले दिनहुँ अबैध तरिकाले भन्सार छली गरेर ल्याएको लाखौंको समानहरु बरामद गर्दै भन्सार बुझाएको छन् ।’
