दाङ । रसुवा जिल्लाको भोटेकोशी नदीमा बुधबार आएको अप्रत्याशित तथा भीषण बाढीपछि उद्धार, राहत र सूचना सम्प्रेषणमा विशेष सावधानी अपनाउन नेपाल पत्रकार महासङ्घ लुम्बिनी प्रदेश समितिले आग्रह गरेको छ । महासङ्घ लुम्बिनी प्रदेशका महासचिव पाण्डव शर्माले विज्ञप्ति जारी गर्दै विपद्का बेला मिथ्या, भ्रमपूर्ण सूचना तथा बीभत्स दृश्य र भिडियोको प्रवाह, प्रकाशन तथा प्रसारण नगर्न सञ्चारमाध्यम, सञ्चारकर्मी र सामाजिक सञ्जाल प्रयोगकर्तालाई आग्रह गर्नुभएको हो ।
बाढीबाट ठूलो जनधनको क्षति भएको भन्दै महासङ्घले घटनामा ज्यान गुमाउनुहुने सम्पूर्णप्रति हार्दिक श्रद्धाञ्जलि अर्पण गरेको छ । साथै, शोकसन्तप्त परिवारजनप्रति गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ ।
सञ्चारकर्मीसहित सयौं व्यक्ति अझै सम्पर्कविहीन रहेको र धेरै जना उद्धारको प्रतीक्षामा रहेको भन्दै महासङ्घले प्रभावित क्षेत्रमा अविलम्ब तथा प्रभावकारी उद्धार र खोज कार्यलाई तीव्र बनाउन सम्बन्धित निकायसँग जोडदार माग गरेको छ । बाढी प्रभावित क्षेत्रमा सञ्चार सेवा प्रभावकारी रूपमा सञ्चालन गर्न आवश्यक व्यवस्था मिलाउन पनि महासङ्घले सम्बन्धित निकायलाई आग्रह गरेको छ ।
महाविपत्तिको यस घडीमा मिथ्या तथा भ्रमपूर्ण सूचना र सामग्री सम्प्रेषण हुँदा पीडित तथा प्रभावित समुदायमा थप त्रास र अन्योल सिर्जना हुन सक्ने भन्दै महासङ्घले सञ्चारमाध्यम, सञ्चारकर्मी तथा सामाजिक सञ्जाल प्रयोगकर्तालाई जिम्मेवार बन्न आग्रह गरेको हो ।
महासङ्घले सही, तथ्यपरक र जिम्मेवार सूचना प्रवाह गर्नु सञ्चार क्षेत्रको व्यावसायिक तथा सामाजिक कर्तव्य भएको उल्लेख गरेको छ । उत्तेजना, डर, निराशा, अनावश्यक आतंक र भ्रम फैलाउने कुनै पनि सामग्री सार्वजनिक नगर्न पनि सबैलाई अनुरोध गरिएको छ ।
नेपाल पत्रकार महासङ्घ लुम्बिनी प्रदेश समितिले विपद्को यस दुःखद घडीमा पीडित परिवार तथा प्रभावित समुदायसँग एकाकार रहेको जनाएको छ । साथै, उद्धार, राहत तथा पुनःस्थापनाका लागि सबै सरोकारवाला निकाय एकजुट भएर अघि बढ्नुपर्ने आवश्यकतामा महासङ्घले जोड दिएको छ ।
महासङ्घ लुम्बिनी प्रदेशका महासचिव पाण्डव शर्माद्वारा जारी विज्ञप्तिमा विपद्का बेला सञ्चार क्षेत्रले सूचना प्रवाहसँगै मानवीय संवेदनशीलता र सामाजिक उत्तरदायित्वलाई समेत उच्च प्राथमिकता दिनुपर्नेमा जोड दिइएको छ ।
