दाङ । घोराही उपमहानगरपालिका–५ त्रिवेणी टोलमा स्थानीयवासीको सक्रियतामा सुरु भएको खेलमैदान निर्माण अभियानले ‘घोराही बनाऔँ अभियान’को साथ पाएपछि थप गति लिएको छ। बुट्यान, भिरालो जमिन तथा खाल्डाखुल्डी रहेको करिब २ बिघा १० कठ्ठा क्षेत्रफलको जग्गालाई सदुपयोग गर्दै स्थानीयवासीले भविष्यमा सुविधासम्पन्न खेलमैदान तथा स्टेडियम निर्माण गर्ने लक्ष्यसहित अभियान अघि बढाएका हुन्।
नजिकै जनसेवा सामुदायिक वन रहेकाले बालबालिका तथा युवालाई गलत गतिविधिबाट टाढा राख्दै खेलकुद र सिर्जनात्मक कार्यमा जोड्न खेलमैदान निर्माणलाई प्राथमिकता दिइएको निर्माण समितिका अध्यक्ष तिलविक्रम पछाईले बताउनुभयो।
“नजिकै जंगल भएकाले बालबालिका गलत गतिविधिमा नलागून् भन्ने हाम्रो मुख्य चिन्ता हो। खेलमैदान निर्माण भएपछि उनीहरूलाई खेलकुदसँगै विभिन्न सकारात्मक गतिविधिमा जोड्न सकिन्छ,” उहाँले भन्नुभयो।
स्थानीयदेखि विदेशमा रहेका नेपालीको सहयोग
खेलमैदान निर्माणका लागि स्थानीयवासीसँगै विदेशमा रहेका नेपालीबाट समेत आर्थिक सहयोग जुटाइएको छ। हालसम्म मैदान निर्माणमा ८ लाख रुपैयाँभन्दा बढी खर्च भइसकेको आर्थिक संयोजक प्रेमप्रकाश केसीले जानकारी दिनुभयो। वडा क्षेत्रभित्रका विभिन्न दाताबाट करिब ५ लाख रुपैयाँको हाराहारीमा सहयोग प्राप्त भएको उहाँले बताउनुभयो।
हाल मैदानको प्रारम्भिक बेस निर्माणको काम अघि बढिसकेको छ। तर मैदानलाई पूर्णरूपमा व्यवस्थित बनाउन तटबन्ध, तारबार, प्याराफिटलगायतका संरचना निर्माण गर्न बाँकी रहेको केसीले बताउनुभयो।
निर्माण अभियानलाई निरन्तरता दिन भैलो खेल्ने, महायज्ञ सञ्चालन गर्ने, चन्दा सङ्कलन गर्ने तथा विभिन्न सहयोग अभियान सञ्चालन गर्ने तयारी गरिएको छ।
घोराही बनाऔँ अभियानको स्थलगत अवलोकन
यसैबीच ‘घोराही बनाऔँ अभियान’का संयोजक सविन प्रियासनको नेतृत्वमा टोलीले त्रिवेणीमा निर्माणाधीन खेलमैदानको स्थलगत अवलोकन गरी निर्माण समितिसँग छलफल गरेको छ।
अवलोकनका क्रममा संयोजक प्रियासनले स्थानीयवासी आफैँ अग्रसर भएर सुरु गरेको खेलमैदान निर्माण अभियान महत्वपूर्ण रहेको बताउनुभयो। उहाँले खेलमैदानलाई स्थानीय आवश्यकता पूरा गर्ने संरचनाका रूपमा मात्र नभई भविष्यमा दाङकै महत्वपूर्ण खेलकुद सम्पत्तिका रूपमा विकास गर्न सकिने सम्भावना रहेको उल्लेख गर्नुभयो।
“स्थानीयवासी आफैँ अघि बढेर सुरु गरेको यस्तो कामले गाउँको विकाससँगै युवाको खेल प्रतिभा विकासमा पनि योगदान पुर्याउँछ,” प्रियासनले भन्नुभयो, “मैदान निर्माणलाई व्यवस्थित ढंगले अघि बढाउन आवश्यक सहयोग, समन्वय र पहलका लागि आफ्नो तर्फबाट साथ रहनेछ।”
उहाँले मैदान निर्माणका लागि आवश्यक दर्ता प्रक्रियामा सहयोग गर्ने तथा अभियानको प्रचारप्रसारमा समेत साथ दिने प्रतिबद्धता व्यक्त गर्नुभयो।
खेलाडीमा बढ्यो उत्साह
हालसम्म व्यवस्थित खेलमैदानको अभावका कारण त्रिवेणी तथा आसपासका खेलाडीले अन्य स्थानमा रहेका मैदान प्रयोग गर्नुपर्ने बाध्यता रहेको स्थानीयको भनाइ छ। आफ्नै क्षेत्रमा व्यवस्थित मैदान बन्ने भएपछि स्थानीय खेलाडी तथा युवामा उत्साह बढेको छ।
स्थानीयवासीका अनुसार मैदान निर्माणको उद्देश्य खेल खेल्ने ठाउँ बनाउनु मात्र नभई युवालाई खेलकुदमा आकर्षित गर्नु, कुलत तथा गलत गतिविधिबाट टाढा राख्नु र स्थानीयस्तरमा लुकेर रहेका खेल प्रतिभालाई अवसर प्रदान गर्नु हो।
जनसेवा सामुदायिक वनका अध्यक्ष श्रीधर बुढाथोकी, शिवशक्ति खानेपानी तथा सरसफाइ समितिका अध्यक्ष भीमबहादुर केसी, त्रिवेणी टोल विकास संस्थाका सचिव मोहनसिंह पछाईलगायत सामाजिक संघसंस्थाका प्रतिनिधिले निर्माणाधीन खेलमैदानलाई पूर्णता दिन सबै पक्षको सहयोग आवश्यक रहेको बताएका छन्।
स्थानीय पहलबाट दीर्घकालीन संरचनाको सपना
त्रिवेणीमा सुरु भएको खेलमैदान निर्माण अभियान स्थानीयवासीको सामूहिक प्रयास र दीर्घकालीन सोचसँग जोडिएको छ। अहिले भिरालो, बुट्यान र खाल्डाखुल्डीले भरिएको जमिनलाई व्यवस्थित खेलमैदानमा परिणत गर्ने अभियान सफल भएमा यसले बालबालिका र युवालाई खेलकुदमा जोड्नुका साथै स्थानीय खेल प्रतिभाको विकासमा समेत योगदान पुर्याउने अपेक्षा गरिएको छ।
स्थानीयवासीले प्रारम्भिक चरणमा आफ्नै स्रोत र पहलबाट काम सुरु गरे पनि आगामी दिनमा तीनै तहका सरकार, निजी क्षेत्र, विदेशमा रहेका नेपाली, सामाजिक संघसंस्था तथा खेलप्रेमीबाट सहयोग आवश्यक रहेको बताएका छन्।
स्थानीयको लक्ष्य स्पष्ट छ—आज खेल्ने मैदान बनाउने, भोलि प्रतिभा जन्माउने र भविष्यमा त्यसैलाई सुविधासम्पन्न खेलकुद केन्द्रका रूपमा विकास गर्ने। त्रिवेणीको यो अभियान त्यसैले एउटा मैदान निर्माणको प्रयास मात्र नभई बालबालिकाको भविष्य, युवाको ऊर्जा र स्थानीय खेल प्रतिभाको सम्भावनासँग जोडिएको सामूहिक सपनाका रूपमा अघि बढिरहेको छ।
