त्रिशूली नदीले सडक कटान गरी भासिएको पृथ्वी राजमार्ग दुईतर्फी सञ्चालनमा
*धादिङ । त्रिशूली नदीले कटान गर्दा भासिएर अवरुद्ध भएको पृथ्वी राजमार्ग दुईतर्फी सञ्चालनमा आएको छ।
धादिङको गजुरी गाउँपालिका-५ गलौदीस्थित पृथ्वी राजमार्गमा त्रिशूली नदीले सडक कटान गर्दा करिब ८० मिटर सडक चर्किएर २० मिटर भन्दा बढी भाग भासिएको थियो। शुक्रबार साँझदेखि अवरुद्ध भएको राजमार्गमा दसैँ मनाउन घर हिँडेका हजारौं यात्रु अलपत्र परेका थिए।
नागढुंगा-नौबिसे-मुग्लिन सडक आयोजना (पूर्वी खण्ड) का अनुसार भित्तातर्फ ब्याक कटिङ गरेर १५७ मिटर लम्बाइ, ६ मिटर चौडाइको नयाँ ट्रयाक निर्माण गरिएको हो। ६ वटा एक्साभेटर, लोडर र ब्याकहो लोडर प्रयोग गरेर माटो पन्छाउने र ग्राभेल गर्ने काम सम्पन्न भएपछि आज दिउँसो ३:१० बजेदेखि सडक दुईतर्फी रूपमा सञ्चालनमा ल्याइएको हो।
सडक खुला भएपनि त्रिशूली नदीको बहाव अझै उच्च रहेकाले चालकहरूलाई सावधानी अपनाएर यात्रा गर्न र ट्राफिक प्रहरीको निर्देशन पालना गर्न अनुरोध गरिएको छ।
