बूढीगण्डकी बाढीः मुग्लिनसम्म जोखिम बढेपछि बाटोमै रोकिए सवारीसाधन
*मुग्लिन । गोरखाको चुमनुब्रीबाट आएको बूढीगण्डकीको लेदो सहितको भीषण बाढीले तल्लो तटीय क्षेत्रमा जोखिम बढाएपछि मुग्लिनसम्म सवारीसाधन बाटोमै रोकिएका छन्।
बाढी पूर्वानुमान महाशाखाका अनुसार बूढीगण्डकीमा आज बिहान ८:४५ बजेसम्म जलसतह ८.५ मिटर पुगेको थियो, त्यसपछि बाढीले आरुघाटस्थित मापन केन्द्र र पुल नै बगाएको छ। महाशाखाले जोखिमलाई तीन चरणमा विभाजन गरेको छ — बेनीघाटसम्म अति उच्च जोखिम, मुग्लिनसम्म उच्च जोखिम र मुग्लिनभन्दा तल मध्यम जोखिम।
बाढीको प्रभाव त्रिशूलीमा करिब ३ मिटर थप बढ्ने र देवघाटमा जलसतह साढे ६ देखि ७ मिटरसम्म पुग्ने अनुमान गरिएको छ।
यसैबीच इलाका प्रहरी कार्यालय मुग्लिनले सम्भावित बाढीको जोखिमलाई ध्यानमा राखेर माइकिङ मार्फत स्थानीयलाई सचेत गराइरहेको छ। नदी किनारका बासिन्दालाई सुरक्षित उच्च स्थानमा जान र नदी छेउछाउ नजान आग्रह गरिएको छ।
प्रहरीका अनुसार हालसम्म चितवनमा बाढी प्रवेश गरेको छैन तर पृथ्वी राजमार्ग अन्तर्गत मुग्लिन-मलेखु-बेनीघाट खण्डमा सावधानीका लागि सवारीलाई रोक-रोक गरी चलाइएको छ। बाढीको बहाव साँझसम्म सामान्य नहुँदासम्म नदी किनारमा नजान सबैलाई अनुरोध गरिएको छ।
