काठमाडौं । गत साता बिरामी पाठोलाई माइक्रोबसको छतमा बाँधेर पोखरा लैजान लागिएको भिडियो सार्वजनिक भएको थियो। भिडियोमा आशिका तामाङ आफैं घटनास्थलमा पुगेर सहचालकलाई पाठोलाई तल झार्न र गाडीभित्र सुरक्षित ठाउँमा राख्न आग्रह गर्नुभएको थियो।
उहाँले भन्नुभएको थियो — _‘मलाई जति गाह्रो हुन्छ, यसलाई कति गाह्रो हुन्छ।’_ चिसोमा छतमा राख्दा थप पीडा हुने भन्दै पैसाका लागि पशुलाई दुःख नदिन र आवश्यक परे आफूले पैसा दिने प्रस्ताव पनि गर्नुभएको थियो।
तर पछि सामाजिक सञ्जालमा केहीले ती सहचालकलाई ‘आदर्श’ भन्दै प्रशंसा गरेपछि सांसद तामाङले फेसबुकमा लेख्नुभयो:
> *‘यी भाइ तपाईंको आदर्श हुन सक्छन्, तर मेरो लागि कदापि हुने छैनन्। पशुप्रति निर्दयी व्यवहार गर्यो, यी भाइ मेरो आदर्श हुन सक्दैनन्।’*
उहाँले अगाडि लेख्नुभएको छ — _‘मिठा र चिल्ला कुरा सुनेर रमाउने भीडभन्दा खस्रो बोली बोले पनि सत्यको बाटो नछाड्ने व्यक्ति हजार गुणा ठीक हुन्छ। मानिस धनी वा गरिब जे भए पनि अन्य प्राणीप्रति हेर्ने दृष्टिकोण, भावना र करुणा महत्वपूर्ण हुन्छ।’_
साथै उहाँले प्रश्न उठाउनुभएको छ — _‘यत्रो नयाँ सरकार आएको छ, नयाँ सांसदहरू छन्, नयाँ नेता छन्। अनि हामी जनता चाहिँ कहिले परिवर्तन हुने?’_
