*काठमाडौं । नेपाल प्रहरीमाथि योजनाबद्ध रूपमा आक्रमण भइरहेको भन्ने विषयमा तथ्य, प्रमाण र तर्कसहित विश्लेषण प्रस्तुत गर्नु व्यावसायिक पत्रकारिताको महत्त्वपूर्ण जिम्मेवारी हो।
यस्तो संवेदनशील अवस्थामा संस्थाको गरिमा, व्यावसायिक मनोबल र सार्वजनिक विश्वाससँग सम्बन्धित विषयमा गम्भीर बहस हुनु आवश्यक छ। तर प्रहरीको जन्मदिन, प्रहरीभित्रका ‘उत्कृष्ट जोडी’ लगायतका विषयमा तस्बिर र श्रव्यदृश्य सामग्री तयार पार्ने क्रममा सक्रिय देखिने केही डिजिटल सञ्चारकर्मीबाट संस्थासँग सम्बन्धित गम्भीर विषयमा पनि त्यस्तै स्तरको अध्ययन, विश्लेषण र तथ्यपरक प्रस्तुति अपेक्षित हुन्छ।
मनोरञ्जनात्मक तथा प्रशंसात्मक सामग्रीको आफ्नै स्थान छ। तथापि, संस्थामाथि प्रश्न उठेका बेला त्यसको पृष्ठभूमि, तथ्य र प्रभावबारे निष्पक्ष रूपमा विश्लेषण गर्नु पनि उत्तिकै महत्त्वपूर्ण हुन्छ।
व्यावसायिक पत्रकारिताको मूल्य केवल सामग्रीको लोकप्रियताले होइन, त्यसको तथ्यपरकता, सन्तुलन र सार्वजनिक महत्त्वले निर्धारण गर्छ। संस्थाका कमजोरी औँल्याउनु, आलोचनाको निष्पक्ष समीक्षा गर्नु र निराधार आरोप भए प्रमाणका आधारमा त्यसको परीक्षण गर्नु पत्रकारिताका समान रूपमा महत्त्वपूर्ण पक्ष हुन्।
नेपाल प्रहरीजस्तो सार्वजनिक संस्थाका सन्दर्भमा सञ्चारकर्मीहरूले प्रशंसा र आलोचनाभन्दा माथि उठेर तथ्य, तर्क र व्यावसायिक निष्पक्षतालाई प्राथमिकता दिन सकेमा संस्थागत जवाफदेहिता र सार्वजनिक विश्वास दुवैलाई बल पुग्नेछ।
पत्रकारिताको वास्तविक पहिचान चाकरी वा विरोधमा होइन, सत्यको खोजी, तथ्यको विश्लेषण र जिम्मेवार अभिव्यक्तिमा हुन्छ।
*लेखक नेपाल प्रहरीका पूर्व एसपी राजेन्द्रबाबू रेग्मी हुन्।*
