भैरहवा । लुम्बिनी प्रदेशमा सम्पन्न डीआईजीस्तरीय सुरक्षा बैठकले सीमा क्षेत्रमा हुने अवैध गतिविधि नियन्त्रणका लागि सूचना आदानप्रदान, अवैध ओसारपसार नियन्त्रण र संयुक्त निगरानी बढाउने निर्णय गरेको छ।
बैठकमा लुम्बिनी प्रदेश अन्तर्गतका जिल्ला प्रहरी प्रमुखहरू, सशस्त्र प्रहरी र नेपाल प्रहरीका उच्च अधिकारीहरूको सहभागिता रहेको थियो।
बैठकले विशेष गरी खुला सीमानाकाबाट हुने लागूऔषध ओसारपसार, हातहतियार तस्करी, मानव बेचबिखन तथा भन्सार छलीका सामानको अवैध ओसारपसारलाई कडाइका साथ नियन्त्रण गर्ने विषयमा छलफल गरेको छ।
दुई सुरक्षा निकायबीच नियमित सूचना आदानप्रदान गर्ने, संवेदनशील क्षेत्रमा संयुक्त गस्ती परिचालन गर्ने र प्रविधिको प्रयोग गरी निगरानीलाई थप प्रभावकारी बनाउने सहमति भएको हो।
साथै, चाडपर्वको समयमा हुन सक्ने सुरक्षा चुनौतीलाई मध्यनजर गर्दै सुरक्षा योजना चुस्त बनाउने निर्णय समेत बैठकले गरेको छ।
