आईतवार मन्त्रिपरिषद बैठक बस्ने काठमाडौं सरकारले लकडाउन खुकुलो पार्नेबारे छलफल थालेको छ। पछिल्लो समय बढाइएको लकडाउनको समयसीमा १५ गते सकिँदै छ। एक महिनाभन्दा बढि समय देखि जारी लकडाउनको अबको स्वरुप कस्तो बनाउँने भन्नेबारे छलफल गर्न कोरोना रोकथाम तथा नियन्त्रण उच्चस्तीय समन्वय समितिको बैठक बसिरहेको छ। सिंहदरबारमा जारी बैठकमा लकडाउनलाई खुकुलो बनाउने कि निरन्तरता दिने भन्ने विषयमा छलफल भइरहेको छ। समितिले अहिलेको परिस्थितिको विश्लेषण गरेर लकडाउनको विषयमा सरकारलाई आवश्यक सुझाव दिनेछ । लकडाउनको कस्तो स्वरुप बनाउँने भन्नेबारे आजको बैठकले सरकारलाई सुझाव दिने छ। भोलि बस्ने मन्त्रिपरिषद् बैठकले निर्णय लिने बताइएको छ। यसअघि शुक्रबार बसेका मन्त्रिपरिषद् बैठकमा लकडाउनलाई कसरी लैजाने भन्ने बारे छलफल भएपछि प्रधानमन्त्री केपी शर्मा ओलीले लकडाउनको नयाँ मोडालिटीबारे छलफल गरी प्रस्ताव ल्याउन उच्चस्तरीय समितिका संयोजक उपप्रधानमन्त्री ईश्वर पोखरेललाई निर्देशन दिएका थिए । कोरोना संक्रमणको अवस्था हेरेर विभिन्न स्थानको वर्गीकरण गरी त्यसै अनुसार फरक फरक नीति लिने सरकारको तयारी छ।
