(एबिसी क्राईम ब्युरो)
नेपाल प्रहरीका बरिष्ठ उपरीक्षक (एसएसपी) दीपक थापाले मंगलबारदेखि महानगरीय अपराध महाशाखाकाको प्रमुखको कार्यभार सम्हालेका छन् । उपत्यकाको अपराध अनुसन्धान तथा नियन्त्रणको जिम्मेवारी पाएको महानगरीय अपराध महाशाखाको कार्यभार सम्हालेका एसएसपी थापा दुई बर्षदेखी प्रहरी प्रधान कार्यालयको आर्थिक प्रशासन महाशाखाको प्रमुख थिए । महाशाखामा रहेर नेपाल प्रहरीलाई बेरुजु फर्छ्यौटमा दुई बर्ष पुरस्कार दिलाउन सफल भएका एसएसपी थापा आफै पनि दुईवटै आर्थिक बर्षमा पुरस्कृत भएका थिए । यसअगाडीका महानगरीय अपराध महाशाखाको प्रमुख रहेका सहकुल थापा डीआईजी बढुवा भएर केन्द्रिय अनुसन्धान ब्युरो (सीआईबी) मा पदस्थापन भएपछी महाशाखा नेतृत्वबिहिन थियो । डीएसपी हुँदा खोटाङ, महाराजगन्ज बृत्त, इलाका प्रहरी कार्यालय बुटवल तथा एसपीको रुपमा जिल्ला प्रहरी कार्यालय चितवनको कमाण्ड सम्हालेका एसएसपी थापा अपराध अनुसन्धान, पुलिसिङ तथा कमाण्ड कन्ट्रोलमा राम्रो दख्खल राख्ने अधिकृतका रूपमा चिनिएका छन्।
