(तेज वली) दाङ । तुलसीपुर उपमहानगरपालिका कार्यालयले आफनो २९ औं स्थापना दिवस मनाएको छ । उपमहानगरले २९ किलो रानीकेक काटेर स्थापना दिवस मनाईएको छ । दिवसका अवसरमा कार्यालयलेे
दीर्घकालिन रणनीतिक तथा आवधिक योजनाको मस्यौदा माथि अन्र्तक्रिया कार्यक्रम गरेको छ । कार्यक्रमको उद्घाटन लुम्बिनी प्रदेश सरकार उद्योग पर्यटन वन तथा बातावरण मन्त्री लिला गिरीले गरेका हुन् । कार्यक्रमका प्रमुख अतिथि समेत रहेका दाङ उपत्यकालाई पर्यटकीय गन्तव्यका रुपमा विकास गर्न चाहेको बताए । उनले दाङ एसियाकै दोस्रो उपत्यका भएकाले यसलाई पर्यटकीय गन्तव्यका रुपमा विकास गर्न आफुहरु तयार भएको बताए ।
पर्यटकीय गन्तव्यका लागि लुम्बिनी पछि दाङ भएको उनको दावी छ । प्रदेशका १२ जिल्ला मध्ये पहाडका हिसावले घुम्न जानुछ भने गुल्मी, अर्घाखाँची र प्युठान, सुन्दर उपत्यका र रमनीय ठाउँमा जानुछ भने दाङ उपत्यका, राष्ट्रिय निकुन्ज र प्राकृतिक हिसावले बाँके तथा बर्दिया र हिमालको अवलोकनका लागी रुकुम पुर्वलाई पर्यटकिय गन्तव्यका रुपमा विकास गर्न सकिने उनको भनाई थियो ।
साथै उनले गएको २० वर्षमा जनताले धेरै दुःख पाएको बताए । अहिले जनप्रतिनिधि आईसकेपछि विकासको मुल फुटे झै चौतर्फि विकास भईरहेको उनको दावी छ । जनप्रनितिधिले अहिले दिनरात नभनी जनताको काम गर्न तल्लिन भएको बताउदै उनले वितेको तीन वर्षमा सडक, विद्युत, खानेपानी, स्वास्थ्य , शिक्षा लगायतका थुप्रै विकास भएको बताए । साथै उनले अझै पनि निरन्तर रुपमा जनताको काममा खट्न र दाङ उपत्यकाको सुन्दरताका लागी उनले स्थानीय सरकार प्रमुखलाई आग्रह गरे । यसका लागी प्रदेश सरकारको तर्फबाट आफुले सक्दो सहयोग गर्ने उनले प्रतिबद्धता व्यक्त गरे ।
नगर प्रमुख घनश्याम पाण्डेको अध्यक्षतामा भएको कार्यक्रमका प्रमुख अतिथि समेत रहेका मन्त्री गिरीले कृषि, वन, पर्यटन संग आधारित उद्योग कलकारखाना स्थापना गरी रोजगारीको सिर्जना गर्ने बताए । उपप्रमुख माया शर्मा आचार्यको स्वागत मन्तव्यबाट सुरु भएको कार्यक्रममा विज्ञ विकिरण गौतमले पाँच बर्षिय आवधिक रणनितिक योजनाको बारेमा जानकारी दिएका थिए । त्यस अवसरमा दुर्गालाल केसीले २५ बर्षिय रणनीतिक योजना तर्जुमाका लागी २५ वटा विषयमा प्रकास पारेका थिए ।
सोही अवसरमा घोराही र तुलसीपुरलाई विपद न्युनीकरण सम्बन्धमा दुई उपमहानगरपालिका विच सहमती भएको छ । तुलसीपुरका नगरप्रमुख घनश्याम पाण्डे र घोराही उपमहानगरपालिकाका नगरप्रमुख नरुलाल चौधरीले सहमती पत्रमा हस्ताक्षर गरेका थिए । त्यस्तै उपमहानगरपालिकाको दीर्घकालिन रणनीतिक तथा आवधिक योजनाको मस्यौदा माथि सोमवार र मंगलवार दुई दिन सम्म छलफल र परामर्श गरी यसलाई अन्तिम रुप दिनका लागी कार्यपालिका बैठकमा पेश गरिने जानकारी दिईएको छ । सो अवसरमा लुम्बिनी प्रदेशका सांसद धनकली चौधरी, घोराही उपमहानगरपालिकाका नगरप्रमुख नरुलाल चौधरी लगाएतले बोलेका थिए ।
कार्यक्रममा तुलसीपुर ४ लामीदमार घर भई हाल क्यानडा बस्ने नर बहादुर टण्डनले किशोरीहरुका लागी २० वटा साईकल सहयोग गरेका थिए । उनले सहयोग गरेको साईकल उनका बुवा ९४ बर्षिय लाल बहादुर टण्डन र आमा ८४ बर्षिया तारादेवी टण्डनले नगरप्रमुख पाण्डे र किशोरीहरुलाई हस्तान्तरण गरेका थिए ।
यस्तै दिवसकै अवसरमा आयोजित कार्यक्रममा कोरोना माहामारी नियन्त्रण तथा रोकथामका लागी फिल्डमा खटिएका स्वास्थ्यकर्मी, प्रचारप्रसारको क्षेत्रबाट सहयोग गरेकोमा विभिन्न सन्चार माध्यम,आर्थिक तथा जिन्सी र खाद्यन्न सहयोग गर्ने दाता लगाएत कृषि,व्यापार, उद्योग लगाएतको क्षेत्रमा क्रियाशिल भएर उदाहरणिय काम गरेका व्यक्ति तथा सामाजिक संघसंस्थाहरुलाई सम्मान गरिएको थियो ।
कार्यक्रमको सहजीकरण नगर प्रवक्ता सुर्य बहादुर डाँगीले गरेका थिए भने कार्यक्रममा २०७८ सालको भित्तेपात्रोको बिमोचन गरिएको थियो । कार्यक्रममा लोक दोहारी गायक प्रेम विवश घर्तिले राम्रो तुलसीपुर ,हाम्रो तुलसीपुर बोलको गीत प्रस्तुत गरेका थिए ।
