(सागर थापा)
कंचनपुर । जिल्ला प्रशासन कार्यालय कञ्चनपुरको निर्णयबमोजिम सञ्चालित मास्क खै अभियानलाई वडा प्रहरी कार्यालय महेन्द्रनगरले सक्रियता पुर्वक सञ्चालन गरेको छ ।
वडा प्रहरीले महेन्द्रनगर बजार क्षेत्र, राजमार्ग र सार्वजनिक स्थानमा मास्क बिना हिँडडुल गर्नेलाई मास्क प्रयोग गर्न आग्रहसहित अभियान सुरु गरिरहेको छ ।
वडा प्रहरी कार्यालय महेन्द्रनगरका प्रमुख प्रहरी निरिक्षक अमर बहादुर माझीले कोरोना संक्रमण नियन्त्रणका लागि मास्क अनिवार्य भएकोले सोही अनुरुप अभियान सञ्चालन भईरहेको बताए । उनका अनुसार ‘तपाईंको मास्क खै? अनिवार्य मास्क लगाउनु है’, अभियान महेन्द्रनगर बजार क्षेत्रसँगै भासी, सुखासाल, बसपार्क लगायतका ठाउँमा सञ्चालन गरिएको छ । प्रशासनको आदेश अनुसार अभियानलाई नियमित रुपमा जारी राख्ने प्रहरीले जनाएको छ ।
‘पहिलो चरणमा कोरोना नियन्त्रणका लागि मास्क लगाउन सम्झाई बुझाई गर्ने गरेका छौँ ।’ प्रहरी निरिक्षक माझीले भने ‘मास्क प्रयोग गर्न अटेरी गरे प्रशासन कार्यालयको निणर्य अनुसार ५० रुपयाँसम्म जरिवाना गरि मास्क वितरण गरिरहेको छौँ ।’ प्रहरीले बजार र आसपासका क्षेत्रमा कोरोना सङ्क्रमण न्यूनीकरणका उपाय अपनाउन माइकिङसमेत गरिरहेको छ । —
