(सर्मिला बोगटी)
धनगढी । सामान्यतया सरकारी कार्यालयमा सेवाग्राहीको भिड लागेको हुन्छ। तर, शुक्रबार नापी कार्याललय कैलालीमा फरक दृश्य देखियो। नापी कार्यालयमै विवाहका लागि झकीझकाउ गरेको देख्दा धेरै अच्चमित भए। कोरोना संक्रमण फैलिएपछि जारी गरिएको निषेधाज्ञाको दोस्रो दिन नापी कार्यालय कैलालीमा एक जोडीको विवाह गरिएको हो।
नापी कार्यालयका एक कार्यालय सहयोगीका अनुसार कार्यालयका प्रमुख नापी अधिकृत सुदर्शन सिंह धामीको बहिनीको विवाह आयोजना गरियो। उनले भने, ‘कैलाली प्रशासनको अनुमतीबाटै विवाहको आयोजना गरिएको हो।’जिल्ला प्रशासन कार्यालय कैलालीका प्रमुख जिल्ला अधिकारी खगेन्द्र रिजालले उक्त विवाहका लागि प्रशासनमा लिखित कुनै पनि सूचना नआएको र आफूले निर्देशन पनि नदिएको बताए।
उनले भने, ‘कार्यालयका हाकिमको आफ्नै घर नभएकोले बहिनीको विवाहका लागि सरकारी कार्यालय प्रयोग गरेको भन्ने सुनेको छु तर, आधिकारीक रुपमा प्रशासनले अनुमती भने दिएको छैन।’
