ABC (क्राईमबिट)
कञ्चनपुर । भन्सार छली अवैध रुपमा भित्र्याईदै गरेका करिब ५ लाख बढीका सामग्रीहरु बरामद गरिएको छ।सशस्त्र प्रहरी बल नेपाल नं ३५ गण हेड क्वाटर शैलेश्वरी मातहत रहेको बोर्डर आउट पोष्ट खड्डाककडबाट गएको संयुक्त मोबाईल गस्ती टोलीले अवैध रुपमा भन्सार छली गरेर भित्र्याउदै गरेका ५ लाख २६ हजार ४ सय बराबरका सामानहरु बरामद गरेको हो।
गस्ती टोलीले कञ्चनपुरको बेलौरी नगरपालिका – १ फटिया, वडा नं ६ नकैया, पुर्नवास नगरपालिका –४ आपताल र बेलडाडी गाउँपालिका –३ बाट किरानाका सामानहरु, प्रतिबन्धीत ब्रोईलर कुखुरा र चल्ला, सुर्ती, मोटरसाईकल लगायतका सामग्रीहरु बरामद गरेको सशस्त्र प्रहरी उपरिक्षक विरेन्द्र बहादुर ऐरले जानकारी दिए ।उनले ब्रोईलर र चल्लाहरुलाई पशुक्वारेन्टाईन कार्यालय गड्डाचौकी बुझाईएको र मोटरसाईकल तथा अन्य सामग्रीहरु आवश्यक कारबाहीका लागी कञ्चनपुर भन्सार कार्यालय गड्डाचौकीमा बुझाईएको बताए ।
यसैबिच कञ्चनपुरबाट लागु औषध सहित १ जना पक्राउ परेका छन । बोर्डर आउट पोष्ट झिलमिलाबाट खटिएको प्रहरी टोलीले बेलडाडी गाउँपालिका – ३ बिचकट्टी सिमाबाट गाउँपालिकाका वडा नं। ५ बस्ने २१ वर्षिय गोपाल रानालाई पक्राउ गरेको हो ।
उनको साथबाट ४ ग्राम ब्राउन सुगर बरामद गरेको र उनलाई आवश्यक कानुनी कारबाहीका लागी ईलाका प्रहरी कार्यालय बेलडाडी पठाईएको जनाईएको छ ।
