(रवि वर्णवाल)
वीरगञ्ज । पर्सा जिल्लामा जारी निषेधाज्ञाको मौका छोपी कालोबजारी गर्ने एकजनालाई पर्सा प्रहरीले पक्राउ गरेको छ ।
सूचना परिचालन तथा प्रहरी कारवाहीको सिलसिलामा वीरगञ्ज महानगरपालिका वडा नम्बर १६ नगवा निवासी ३२ वर्षीय रामहरि तिवारीले आफ्नै घरमा खोलेको औषधी पसलबाट बढी मूल्यमा मेडिकल उपकरण बिक्रि गरेर उपभोक्तालाई ठगी गरेको पाइएको छ ।
रु. १९ सय पर्ने अक्सिमिटरलाई रु. ३५ सय भन्दा बढी मूल्यमा बिक्रि गरेर कालोबजारी गरेको सूचनाको आधारमा खटिएको जिल्ला प्रहरी कार्यालय पर्साको टोलीले १२ थान अक्सिमिटरसहित तिवारीलाई नियन्त्रणमा लिएको छ ।
तिवारीमाथी कालोबजारी सम्बन्धी कसुरमा आवश्यक अनुसन्धान अगाडी बढाइएको जिल्ला प्रहरी कार्यालय पर्साका प्रहरी प्रवक्ता डिएसपी ओमप्रकाश खनालले जानकारी दिए ।
