कोरोना जित्नेको संख्या ३ लाख ६७ हजार नाघ्यो संक्रमणमुक्त हुदै

(ABC-Sanchar)
काठमाडौं । नेपालमा कोरोना भाइरसलाई पराजित गर्नेको संख्या ३ लाख ६७ हजार नाघेको छ ।
पछिल्लो २४ घण्टामा मात्रै ४ हजार ७ सयजना कोरोनासंक्रमण मुक्त भएसँगै नेपालमा कोरोनालाई जित्नेको संख्या ३ लाख ६७ हजार ९४ पुगेको छ । हाल नेपालको संक्रमण मुक्त तथा निको हुने दर ७६ प्रतिशत रहेको स्वास्थ्य तथा जनसंख्या मन्त्रालयले जनाएको छ ।
यस्तै पछिल्लो २४ घण्टामा नेपालमा ९ हजार २ सय ७१ जना कोरोना संक्रमित थपिएका छन् । देशैभर १७ हजार ६ सय २३ जनाको पीसीआर र ७ सय ८८ जनाको एन्टिजेन विधिबाट गरिएको परीक्षणमा ९ हजार २ सय ७१ जनामा संक्रमण पुष्ठि भएको हो ।

योसँगै नेपालमा जम्मा कोरोना संक्रमितको संख्या ४ लाख ३ हजार ७ सय ९४ जना पुगेको छ । हाल नेपालमा ९३ हजार १ सय ४१ जना सक्रिय संक्रमित रहेका छन् ।

सोही अवधिमा देशैभर १ सय ३९ जनाको ज्यान गएको छ । स्वास्थ्य तथा जनसंख्या मन्त्रालयका अनुसार एकैदिन ज्यान गुमाउनेको यो संख्या अहिलेसम्मकै धेरै हो ।
योसहित अहिलेसम्म ३ हजार ८ सय ५९ जनाले ज्यान गुमाएका छन् । रासस