(ABC-Sanchar)
दाङ । कोरोना संक्रमणको जोखिम बढेपछि दाङमा बैशाख १७ गतेदेखि जारी लकडाउन जेठ १५ गतेसम्म लम्ब्याइएको छ। यो तेस्रो चरणको लकडाउनमा केही मापदण्डहरु समेत परिवर्तन गरिएको छ। बैशाख १७ गतेदेखि बैशाख २५ गतेसम्म अतिआवश्यकी बस्तु खरिद गर्न विहान ७ बजेदेखि ८ बजेसम्म दैनिक पसल खुल्ने गरेको थियो भने बैंक पूर्ण रुपमा बन्द गरिएको थियो । 
बैशाख २५ गतेदेखि जेठ १ गतेसम्म लम्ब्याइएको लकडाउनमा अरु अथावत राखेर बैंक हप्तामा दुई दिन खुल्ने गरी मापदण्डहरु परिवर्तन गरिएको थियो ।
यो तेस्रो चरणको जेठ १ गतेदेखि १५ गतेसम्मको लकडाउनमा भने कोरोना संक्रमण र मृत्यु दर बढेको भन्दै जिल्ला कोभिड १९ संकट व्यवस्थापन केन्द्रले अतिआवश्यकीय पसलहरु पनि अब हप्तामा दुई दिन मात्र खुल्ने गरी निर्णय गरेको छ।
शुक्रबार बसेको व्यबस्थापन केन्द्रको बैठकले यस्तो निर्णय गरेको हो । यस अघि प्रत्येक दिन विहान ७ देखि ८ बजेसम्म सामग्री किन्ने समयमा भीडभाड बढेको भन्दै अबदेखि हप्तामा दुई दिन आईतबार र बुधबार विहान ७ बजेदेखि ८ बजेसम्म मात्रै सामग्री किन्न पाईने व्यबस्था मिलाइएको संकट व्यवस्थापन केद्रका संयोजक तथा प्रमुख जिल्ला अधिकारी दीर्घनारायण पौडेलले बताउनुभयो ।
