(प्यार अलि खान)
प्यूठान । सरुमारानी गाउँपालिकाले समुदाय स्तरमा कोरोना परिक्षणलाई तिब्रता दिएको छ।
किट अभावमा रोकिएको परीक्षण आज बुधबार देखि सुरु गरिएको गाउँपालिकाका स्वास्थ्य शाखा प्रमुख टेकेन्द्र रायमाझीले जानकारी दिए।
पालिकाको वडा नं २ गनाहा र वडा नं ६ तिरामका स्थानीयहरुमा कोरोना परिक्षण गरिएको हो।
गनाहा बस्तिका २० जना स्थानियमा गरिएको परिक्षणमा १२ जनाको नतिजा पोजेटिभ आएको छ। तिराममा २१ जनाको परिक्षण गर्दा ११ जनाको रिपोर्ट पोजेटिभ आएको रायमाझीले बताए। ‘कोरोना संक्रमित सामान्य अवस्थामै हुनुहुन्छ।’ रायमाझीले भने, होम आइसोलेशनमा बस्न सल्लाह दिएका छौं। विरामीको अवस्था हेरिकन औषधि पनि दिन्छौ।’ भोली बिहीबार दरभान बजारमा परिक्षण गर्ने योजना रहेको उनले सुनाए।
कोरोना संक्रमितको अवस्था सामान्य रहेको र आवस्यक परामर्श समेत गाउँपालिकाले दिँदै आइरहेको गाउँपालिका अध्यक्ष झगबहादुर विश्वकर्माले बताए। २ सय एन्टीजिन किट आईसकेको र थप १ सय थान किट मगाईएको उनले जानकारी दिए।
गाउँपालिकाले ३ वर्ष अघिदेखि नै हंसपुर, ढुङ्गेगढी तथा बाङ्गेसाल स्वास्थ्य संस्थामा ल्याब सुविधा थप गरेको छ। ल्याब सुविधा नरहेका ठाउँमा कोरोना परिक्षणलाई प्राथमिकतामा राखिएको अध्यक्ष विश्वकर्माले बताए।
‘हाम्रो आईसोलेशनमा २ जना कोभिड विरामीको उपचार चलिरहेको छ।’ विश्वकर्माले भने, ‘२ जना निको भएर घर फर्के।’ १५ बेडको तयारी गरिएको उनले बताए। कोरोना रोकथाम उपचार तथा नियन्त्रणमा गाउँपालिकाका स्वास्थ्यकर्मी समेत संक्रमित भएको गाउँपालिकाले जनाएको छ।
