ABC (क्राईमबिट)
काठमाडौं । नेपाल प्रहरीका अवकाशप्राप्त वरिष्ठ अधिकृत रमेश प्रसाद खरेलको स्वास्थ्यमा सुधार देखिएको छ ।
कोरोना संक्रमणका कारण करिब तीन सातादेखी नेपाल प्रहरी अस्पतालमा उपचाररत खरेलको स्वास्थ्यमा व्यापक सुधार देखिएको नेपाल प्रहरीका केन्द्रिय प्रवक्ता एसएसपी बसन्तबहादुर कुँवरले जानकारी दिए । एसएसपी कुँवरका अनुसार खरेलको नेपाल प्रहरी अस्पतालको आइसियुमा उपचार भइरहेको छ ।
‘पछिल्लो एक हप्तादेखि उहाँको स्वास्थ्यमा चामत्कारिक सुधार आएको छ, उहाँ अब खतरामुक्त हुनुहुन्छ’ एसएसपी कुँवरले भने ।
कोरोना संक्रमणको कारण फोक्सोमा गम्भीर इन्फेक्सन देखिएपछी उनलाई तीनसाता अगाडी नेपाल प्रहरी अस्पतालको भेन्टिलेटरमा राखेर उपचार शुरु गरिएको थियो । त्यसबेला खरेलको स्वास्थ्य अवस्था अत्यन्तै जटिल देखिएपछि भेन्टिलेटरमा हाई फ्लो अक्सिजन दिइएको थियो ।
निमोनियाको कारण फोक्सोमा गम्भीर इन्फेक्सन देखिएका पुर्व प्रहरी अधिकृत खरेलको लागि भारतबाट टोसिलिजुम्याब (Tocilizumab) नामक इन्जेक्सन मगाएर लगाइएको उनको पारिवारिक स्रोतले जानकारी दिएको छ । खरेलको लागि भारतीय प्रहरीको उच्च पदमा कार्यरत उनका एक साथीले हेलिकप्टरमार्फत औषधि पठाइदिएका थिए ।
सोही इन्जेक्सनको कारण स्वास्थ्यमा क्रमिक सुधार आएपछी खरेललाई पछिल्लो एक सातादेखि आइसियुमा राखेर उपचार जारी राखिएको नेपाल प्रहरी अस्पताल स्रोतले जानकारी दियो ।
नेपाल प्रहरी अस्पताल स्रोतका अनुसार सोमबार अपरान्हदेखि खरेललाई तीन किलो प्रतिघन्टाको फ्लोमा नाकबाट मात्रै अक्सिजन दिइएको छ ।
यहि हिसाबले क्रमश सुधार हुँदै गए सम्भवत मंगलबार साँझदेखि उनलाई अक्सिजन हटाएर क्याबिनमा सार्न सकिने स्रोतले जानकारी दियो । अस्पताल स्रोतले जनाएअनुसार खरेललाई यसैसाता डिस्चार्ज गर्न सक्ने बुझिएको छ ।
