(महेन्द्र सिंह)
बाँके । जिल्ला प्रहरी कार्यालय बाँकेका प्रहरी प्रमुख एसपी श्याम कृष्ण अधिकारीले आपराधिक गतिविधिलाई नियन्त्रण गर्ने प्रतिबद्धता जनाउनुभएको छ । बाँकेको प्रहरी प्रमुखको जिम्मेवारी सम्हाल्दै बुधबार पत्रकारसँगको परिचयात्मक कार्यक्रममा उहाँले खुला सीमानाका क्षेत्रमा हुने चोरी तस्करी तथा आपराधिक गतिविधि नियन्त्रण गर्ने प्रतिबद्धता जनाउनुभएको छ ।
अपराधको वर्गिकरण गरेर त्यसै अनुसार योजना बनाउने र त्यसलाई निरुत्साहित पारिने पनि प्रतिबद्धता जनाउनु भयो । बाँके जिल्लामा लागुऔषध कारोवार र प्रयोग दुवैको ट्रान्जिट प्वाइन्ट भएको भन्दै उहाँले त्यसको नियन्त्रणमा कुनै कसुर बाँकी नराखिने विश्वास दिलाउनुभयो ।
बरामद गरिएको लागु औषध महिना महिनामा सार्वजनिक गरिने र पत्रकारकै रोहवरमा नष्ट गरिने उहाँको भनाइ थियो । यसअघि प्रहरीले बरामद गर्ने लागु औषध कहाँ र कसरी नष्ट गरिन्छ भन्दै प्रहरी माथि प्रश्न उठ्ने गरेको थियो । उहाँले विपद्बाट हुने जोखिम र क्षती कम गर्ने उपायबारे प्रहरी तयारी अवस्थामा रहेको जानकारी गराउनुभयो ।
