(ABC-Sanchar)
दाङ । निरन्तर अविरल वर्षात्का कारण घर भत्केर मृत्यु भएका पीडित परिवारलाई राहत रकम वितरण गरिएको छ ।
घोराही उपमहानगरपालिका–१७ क्वाडीस्थित घर भत्किँदा बिहीबार तीन महिनाकी बालिका बिन्दु चौधरीको मृत्यु भएको थियो । घटनामा आमा र दिदी घाइते भएका थिए ।
जिल्ला प्रशासन कार्यालय दाङ र घोराही उपनगरपालिकाले मृतक चौधरीका बुबा आशाराम चौधरीलाई राहत रकम प्रदान गरेको छ । उपमहानगरपालिकाका प्रमुख नरुलाल चौधरीले जिल्ला विपद् व्यवस्थापन समितिको तर्फबाट दुई लाख र उपमहानगरपालिकाको तर्फबाट किरिया खर्चबापत २५ हजार गरी दुई लाख २५ हजार प्रदान गरेका छन् ।
राहत दिन प्रमुख चौधरी दाङका प्रमुख जिल्ला अधिकारी रामबहादुर कुरुम्बाङ र दाङ प्रहरी प्रमुख एसपी सुरेश काफ्ले लगायतले पीडितको घरमै पुगेका सहयोग गरेका थिए । रासस
