ABC (क्राईमबिट)
काठमाडौं । नेपाल प्रहरीका नवनियुक्त प्रहरी अतिरिक्त महानिरीक्षक (एआईजी) सहकुलबहादुर थापा दर्ज्यानी चिह्नद्वारा सुशोभित भएका छन् ।
आज (आइतबार) प्रहरी प्रधान कार्यालयमा आयोजित विशेष कार्यक्रममा प्रहरी महानिरीक्षक (आईजीपी) शैलेश थापा क्षेत्रीले एआईजी थापालाई दर्ज्यानी चिह्न लगाइदिएका हुन् ।
उक्त कार्यक्रममा आईजीपी थापाले प्रहरी अतिरिक्त महानिरीक्षक थापालाई बधाई दिँदै बढुवासँगै बढेको दायित्व र जिम्मेवारीलाई प्रतिबद्वता अनुरूप नयाँ उर्जाकासाथ निर्वाह गर्न निर्देशन दिए । संगठनको थप सुदृढिकरण र विकासका लागि व्यावसायिकता र पेशागत धर्ममा रही हरेक कार्यलाई सहजरूपमा लिदै स्वमूल्याङ्कन गरी पूर्ण निष्ठाका साथ अगाडि बढ्नुपर्ने उनले बताए । बढुवामा परिवारको पनि साथ सहयोग हुने भएकोले आफ्नो प्रगतिलाई परिवारमा समर्पण गर्नुपर्ने उनले उल्लेख गरे ।
समारोहमा बढुवा भएका प्रहरी अतिरिक्त महानिरीक्षक सहकुल बहादुर थापाले नेपाल सरकार एवम् प्रहरी संगठनबाट प्राप्त गहन जिम्मेवारीलाई मन, वचन र कर्मका साथ संगठनको उदेश्य प्राप्तिका खातिर काम गर्ने प्रतिवद्धता व्यक्त गरे । आफू बोलाई भन्दा गराईमा विश्वास गर्ने भएकाले आफ्नो बुद्धि, विवेक र ईमानदारिताका साथ संगठनको श्रीवृद्धिमा लाग्ने उनले उल्लेख गरे ।
गत बिहिवार बसेको मन्त्रीपरिषदको बैठकले थापालाई एआईजी पदमा बढुवा गर्ने निर्णय गरेको थियो । सोही मन्त्रीपरिषद बैठकले एआईजी थापालाई प्रहरी प्रधान कार्यालयको मानवस्रोत तथा प्रशासन बिभागमा पदस्थापन गरेको थियो
