ABC (क्राईमबिट)
दाङ । घोराही उपमहानगरपालिका वडा नम्बर १३ डुमरगाउँका गणबहादुर घर्तीको घरमा जुवा खेलिरहेको अवस्थामा नगद १ लाख २२ हजार ५१० सहित १० जना जुवाडे पक्राउ परेको जिल्ला प्रहरी कार्यालय दाङले जनाएको छ ।
शुक्रबार दिउँसो अपरान्ह साढे ४ बजेतिर जुवा खेलिरहेको अवस्थामा घोराही-१३ का ५२ वर्षिय कमान पुन, ४२ वर्षका लोकबहादुर घर्ती, ४५ वर्षका प्रेम पुन, ४२ वर्षका आइतबहादुर घर्ती, ३४ वर्षका ज्ञानसिंह बुढा पक्राउ परेको जिल्ला प्रहरी कार्यालय दाङका प्रहरी प्रवक्ता डिएसपी मुकुन्द रिजालले जानकारी दिनुभयो ।
यस्तै घोराही-१२ का ४० वर्षिय तेजलाल पुन, घोराही-१३ का ६८ वर्षिय गणबहादुर घर्ती, घोराही-१४ का २४ वर्षिय त्रिपन बुढा, घोराही-१५ का २२ वर्षिय निमबहादुर रोका र ३३ वर्षिय ढोका घर्ती पक्राउ परेको प्रवक्ता डिएसपी रिजालले जानकारी दिनुभयो ।
पक्राउ परेका साथबाट नगदसहित ६ गड्डी तास पनि बरामद गरिएको छ । पक्राउ परेका १० जनालाई नै जुवा ऐन अन्तर्गत मुद्धा चलाईने प्रहरीले जनाएको छ । नेपालको कानुनमा सट्टाबाजी जुवा खेल्न नपाइने उल्लेख छ । जुवा ऐनमा १ वर्षसम्म कैदको सजाय व्यवस्था गरिएको छ ।
