(ABC-SANCHAR)
काठमाडौं । नेपाली कांग्रेस बाँकेको सभापति दौडबाट बाहिरिएका लुम्बिनी प्रदेशका वन, वातावरण तथा भू-संरक्षण मन्त्री सुरेन्द्र बहादुर हमालले दोस्रो चरणको निर्वाचनमा सभापतिमा कसलाई मत हाल्ने भन्ने विषयमा मतदाताहरु स्वतन्त्र रहेको बताएका छन् ।
केहीबर अघि प्रतिक्रिया दिँदै मन्त्री हमालले आफ्नो समूहभित्र देखिएको ‘पञ्चायती शैली’विरुद्ध लड्ने बताएका छन् । “मान्छे मर्यो भन्नु भन्दा पनि काल पल्क्यो भन्ने कुरा देखियो, हामी त सुरुवातदेखि नै निष्ठा र स्वाभिमानको राजनीति गर्दै आएको मान्छे हौं, कसैको दासत्व हामीलाई स्विकार्य हुँदैन,” उनले भने-“दोस्रो चरणमा कसलाई मत हाल्ने भन्ने विषयमा मतदाताले पक्कै आफ्नो विवेक प्रयोग गर्नुहुन्छ, मैले यसलाई भोट हाल्नुस् भन्दिनँ तर हाम्रो समूहभित्र देखिएको अराजक र निरंकुश प्रबृत्ति विरुद्ध हाम्रो लडाइँ रहन्छ ।”
उनलाई संस्थापन समूहले सभापतिकै निर्देशन भनेर आधिकारिक उम्मेदवार घोषणा गरिएपनि सहमहामन्त्री किशोरसिंह राठौरको साथ पाएका बादशाह कुर्मीले उनी भन्दा धेरै मत पाएर दोस्रो चरणमा संस्थापन इतरका नारायणप्रसाद गौडेलसंग आज दोस्रो चरणको निर्वाचनमा प्रतिष्पर्धा गर्दैछन् । हमालले राठौरले केन्द्रको निर्देशन विपरीत मनोमानी गरेको भन्दै आफ्नो लडाइँ रहिरहने प्रष्ट पारेका छन् । हमालको यो भूमिकाले गौडेललाई फाइदा पुग्ने विश्लेषण गरिएको छ । हमाललाई आएको मत पाउने विश्वास लिएका संस्थापन समूहका नेताहरु हमालको यो प्रतिक्रियाले निराश बनेको बताइएको छ । दोस्रो चरणको निर्वाचन विहान १० बजेदेखि शुरु हुँदैछ ।
