(ABC=SANCHAR)
काठमाडौं । नेपाल वायुसेवा निगमका अध्यक्ष युवराज अधिकारी निलम्बनमा परेका छन् । दुई पटक स्पष्टिकरण सोध्दा पनि चित्तबुझ्दो जवाफ नदिएपछि उनलाई सरकारले निलम्बन गरेको हो ।
निगमभित्र अनियमितता गरेको आरोपमा उनी निलम्बनमा परेका हुन् । अधिकारीले कानूनी आधार र औचित्य बिना ट्वीनेटर जहाज भाडामा दिएको, निगमको जहाज साउदी अरब सञ्चालन गर्ने प्रयोजनका लागि भ्रमण कार्यमा विना निर्णय जम्बो टोली सहभागी गराई निगमलाई नोक्सान गरेको, सार्वजनिक प्रतिस्पर्धा नगराई एउटा कम्पनी टिकट बिक्रिको ठेक्का दिएर आर्थिक लाभ लिएको, निगमका अधिकारी तथा कर्मचारीलाई अनुशासनमा राख्न नसकेको भनेर उनलाई स्पष्टिकरण सोधिएको थियो ।
उनलाई कार्यकारी अध्यक्षको जिम्मेवारीमा थप राख्दा निगमनको ख्यातीमा आँच आउने र थप वित्तिय हानि नोक्सारी हुने, कर्मचारीको मनोल गिर्न गई निगमको प्रतिकुल असर पर्ने देखिएकाले स्पष्टिकरणको जवाफ प्राप्त नहूँदासम्म उनलाई नेपाल वायुसेवा निगम ऐन २०१९ को दफा २० बमोजिम निलम्बन गरिएको प्रधानमन्त्री कार्यालय स्रोतले बताएको छ ।
आफुलाई निलम्बन गर्न लागेको थाहा पाएपछि अधिकारीले केही दिनअघि पर्यटन मन्त्री प्रेम आलेसँग भएको कुराकानीको अडियो तोडमोड गरी सार्वजनिक गरेका थिए । अनुमतिबिना त्यसरी अडियो रेकर्ड गर्न समेत नमिल्ने भएकाले त्यस विषयमा पनि मन्त्री आलेले उनीमाथि कारबाहीको तयारी गरेका छन् ।
गत वर्ष कात्तिक ८ गते नियुक्त भएका उनी सुरुदेखि नै अनेकौं विवादमा परेका थिए । यसअघि निगममा कार्यरत रहँदा पनि उनी महिला कर्मचारीलाई यौन दुव्र्यवहार गरेको घटनामा मुछिएका थिए ।
