ABC-Sanchar
काठमाडौं । भक्तपुर नगरपालिका–१ सल्लाघारीमा रुख ढलेर बस र स्कुटरलाई च्याप्दा तीन जनाको मृत्यु भएको छ भने १५ जना घाइते भएका छन् ।
सल्लाको रुख ढलेर काठमाडौंबाट भक्तपुरतर्फ गइरहेको बा २ ख ३५८४ नम्बरको यात्रुबाहक बस र बा ६१ च नम्बरको स्कुटरलाई च्याप्दा तीनजनाको मृत्यु भएको प्रमुख जिल्ला अधिकारी रुद्रादेवी शर्माले बताउनु भयो। साथै, १५ जना घाइते भएका छन् ।
घाइतेहरूलाई भक्तपुरमा रहेका इवामुरा अस्पताल र भक्तपर अन्तर्राष्ट्रिय अस्पताल उपचार भइरहेको प्रजिअ शर्माले जानकारी दिनुभयो । मृृत्यु भएका तीनमध्ये एक जनाको सनाखत भएको शर्माले बताएका छन् । मृतक २५ वर्षीय विशेष खर्वुजाको सनाखत भएको हो । अन्य दुई जनाको सनाखत हुन बाँकी छ ।
घटनाबारे गृहमन्त्री बालकृष्ण खाणले प्रजिअ शर्मा र जिल्लास्थित सुरक्षा निकायका प्रमुखहरुलाई घाइतेहरुको यथाशीघ्र उपचारको व्यवस्था गर्न निर्देशन दिनुभएको छ ।
गृहमन्त्री खाणले ढलेका रुख र च्यापिएका सवारी हटाएर सडक सुचारु गर्न पनि निर्देशन दिनुभएको छ ।अहिले नेपाली सेनाले सडकमा ढलेका रुख हटाउने काम गरिरहेको छ । सल्लाको ठूलो रुख ढलेकाले हटाउन केही समय लाग्ने प्रजिअ शर्माले बताउनुभयो ।
