(ABC-Sanchar)
काठमाडौं । प्रधानमन्त्री शेरबहादुर देउवालाई चुनावी चटारो छ । उमेरजन्य हिसाबले पनि उनी चुनावमा बढी केन्द्रित हुँदा यता प्रधानमन्त्री कार्यालयमा भने निजी सचिव जनक भट्टको हालीमुहाली भएको स्रोतले बताएको छ ।
समाचार स्रोतका अनुसार, प्रधानमन्त्रीको पीए हुँदा भट्टले विगतमा जुन पार्टीको प्रधानमन्त्री भयो, त्यो पार्टी निकटका प्रशासकहरुलाई संरक्षण गर्ने गरेका थिए । तर भट्टका हकमा भने यो नीति लागू हुन सकेन । सत्ता गठबन्धनलाई असहयोग गर्ने भनेर चिनिएकै कर्मचारीहरुलाई संरक्षण गर्ने गरेका भट्टले प्रधानमन्त्री देउवालाई गलत सल्लाह दिने गरेको समाचार स्रोतले बताएको छ । समाचार स्रोतका अनुसार, उनलाई प्रधानमन्त्री देउवाका प्रशासनिक सल्लाहकार जनार्दन नेपालले समेत साथ दिंदैआएका छन् । भट्ट–नेपालले प्रशासनिक सल्लाह उनीहरुको अनुकूल दिंदैआएको आरोप छ । यतिसम्म कि भट्ट शक्तिको दुरुपयोग गरी ३ महिनाअघि भारतका लागि उपमहाबाणिज्यदूत नियुक्त भए । यो नियुक्ति पाउँदा समेत प्रधानमन्त्री देउवाले सुईको समेत पाएनन् ।
प्रधानमन्त्रीको पीएको पदको दुरुपयोग गरी सोझा उद्योग मन्त्री दिलेन्द्र बडुमार्फत् कलकत्ताको उपमहाबाणिज्यदूत हुन सफल भएको स्रोतले बताएको छ । मन्त्री बडुलाई प्रधानमन्त्रीको हवाला दिएर आफ्नो काम फत्ते गराएका भट्टले परराष्ट्र मन्त्री डा. नारायण खड्कालाई समेत गुमराहमा राखेका छन् । उपमहाबाणिज्यदूत नियुक्तिको मापदण्ड समेत प्रधानमन्त्री कार्यालयबाटै खारेज गरिएको चर्चा हुन थालेको छ ।
समाचार स्रोतका अनुसार, भट्टको
सक्रियतामा बडुको संलग्नता बेगर नै प्रधानमन्त्री कार्यालयबाटै नियुक्ति अगाडि मापदण्ड खारेज गरेको बताइए पनि त्यसका बारेमा हालसम्म गुपचुप राखिएको छ । परराष्ट्र मन्त्रालयमा हाजिर गरिरहेका भट्ट निर्वाचनको परिणामपछि कलकत्ता जाने योजनामा छन् ।
निर्वाचनको परिणामपछि पुनः प्रधानमन्त्रीमा देउवा नै दोहोरिने अवस्था आयो भने पीएको रुपमा केही समय कार्यरत रहने उनको दाउ छ । यदि, देउवा दोहोरिने अवस्था नआए उनी कलकत्ता लुसुक्क जाने सुरमा छन् ।
केही समयअघि परराष्ट्र सचिव भरत पौडेलले भट्टलाई कलकत्ता हाजिर हुन जान अनुरोध गरेका थिए । निर्वाचन अघि नै हाजिर हुन जान सुझाएका उनले अहिले कार्यरत उपमहाबाणिज्यदूत तर्कराज भट्टलाई समयअघि नै फर्काइदिने प्रतिबद्धता समेत प्रकट गरेका थिए । तर, जनक भट्टले चुनावी परिणाम हेरेर मात्रै निर्णय लिने भन्दै उनको प्रस्ताव अस्वीकार गरेका थिए ।
तर्कराज तत्कालीन उद्योग मन्त्री लेखराज भट्टका पालामा कलकत्तामा गएका हुन् । उनको कार्यकाल यही मंसिर १९ मा सकिंदैछ । परराष्ट्रमा हाजिर गरे पनि जनक भट्ट प्रधानमन्त्रीको निजी सचिवको रुपमा कार्यरत रही हालीमुहाली गरिरहेका छन् । उनको नियुक्ति विवादबारे अख्तियार दुरुपयोग अनुसन्धान आयोगमा उजुरी परे पनि आयुक्त जयबहादुर चन्दको कृपाका कारण कारबाही अगाडि बढ्न नसकेको प्रधानमन्त्री कार्यालय स्रोतले बताएको छ ।दृष्टि-न्युजबाट
