(ABC-Sanchar)
काठमाडौँ । चालु आर्थिक वर्षको तीन महिनामा सडक विभागले पौने ७ अर्ब रुपैयाँ खर्च गरेको छ । प्रथम त्रैमासिक प्रतिवेदनअनुसार विभागले साउन, भदौ र असोजमा ६ अर्ब ७३ करोड रुपैयाँ खर्च गरेको हो । कुल ३४ अर्ब ६ करोड रुपैयाँ खर्च गर्ने लक्ष्य भए पनि विभागले १९.७५ प्रतिशत मात्र खर्च गर्न सकेको छ ।
विभागका प्रवक्ता एवं उपमहानिर्देशक भिमार्जुन अधिकारीका अनुसार प्रथम त्रैमासिक लक्ष्य ९५ किलोमिटर कालोपत्रे सडक निर्माण गर्ने थियो । ३८ किमि मात्र कालोपत्रे सडक निर्माण गरिएको छ । त्यस्तै, ग्राभेल स्तरको सडक १३८ किमि निर्माण गर्ने लक्ष्य रहेकोमा ४४ किमि, माटे सडक १८१ किमि निर्माण गर्ने लक्ष्य रहेकोमा ४० किमि र आवधिक मर्मत १२० किमि गर्ने रहेकोमा ९ किमि मात्र भएको सडक विभागले जनाएको छ । ६१ वटा पुल निर्माण गर्ने लक्ष्य राखिएकोमा ११ वटा मात्र पुल निर्माण भएको छ ।
‘लक्ष्य राखेको मिलेको छैन, साउन र भदौमा पानी धेरै पर्यो, त्यसपछि चाडबाड लाग्यो,’ प्रवक्ता अधिकारीले भने, ‘त्यसैले लक्ष्यअनुसार काम हुन सकेन ।’ सडक कालोपत्रे र पुल निर्माणले गर्दा खर्च बढी देखिने उनको भनाइ छ । ‘पुलको काम चिठ्ठि लेखेरै बर्खामा नगर्न भन्छौं, यो बेला कालोपत्रेको काम पनि हुँदैन,’ उनले भने, ‘त्यसैले यसमा कम प्रगती देखिएको हो, बल्ल काम गर्ने समय सुरु भएको छ, अहिले कतै अवरोध नभएकाले निर्माणको कामले गति लिने छ ।’ भौतिक पूर्वाधार तथा यातायात मन्त्रालयअन्तर्गत सबैभन्दा बढी बजेट खर्चिनेमा सडक विभाग पर्छ । चालु आवमा सडक विभागका लागि १ खर्ब २२ अर्ब ७२ करोड रुपैयाँ बजेट विनियोजन गरिएको छ ।
