(ABC-Sanchar)
काठमाडौं । जापानका प्रधानमन्त्री फुमियो किशिदाले एक र्यालीलाई सम्बोधन गर्न लागेका बेला ठूलो विष्फोटको आवाज सुनिएको छ । यसपछि उनलाई त्यहाँबाट सुरक्षितरुपमा निकालिएको छ । यो घटना देशको पश्चिमी शहर वाकायामामा शनिबार बिहान भएको हो। प्रधानमन्त्री किशिदामाथि स्मोक बम प्रहार भएको बताइएको छ ।
टिभी फुटेजमा अधिकारीहरूले क्षेत्र खाली गर्दै र एक व्यक्तिलाई घटनास्थलबाट टाढा लगेको देखाइएको छ। एक प्रत्यक्षदर्शीका अनुसार उनले एक व्यक्तिलाई केहि फ्याँकिरहेको देखे, जसबाट पछि धुवाँ निस्किरहेको थियो। सोही क्रममा केहीले ठूलो बमको आवाज सुनेको बताएका छन् । रिपोर्टका अनुसार प्रधानमन्त्री किशिदा नजिकै पाइपजस्तो वस्तु फ्याँकिएको थियो ।
तस्बिरमा तीनजना प्रहरी अधिकारीले एक संदिग्धलाई भुइँमा लडाएर समातिरहेको देखिन्छ । प्रहरीले एक जनालाई पक्राउ गरेको जनाएको छ । तर, यसबारे थप जानकारी दिन भने प्रहरीले अस्वीकार गरेको छ । समाचार एजेन्सी रोयटर्सका अनुसार विस्फोटको आवाज सुनेपछि प्रधानमन्त्री किशिदालाई सुरक्षा कवचमा लगिएको थियो । यसै क्रममा जापानको आधिकारिक मिडिया एनसीएचकेका अनुसार घटनास्थलमा प्रहरीले एक व्यक्तिलाई आफ्नो नियन्त्रणमा लिएको देखिएको छ । भिडिओ फुटेजमा भीड भागिरहेको र धेरै पुलिस अधिकारीहरूले एक व्यक्तिलाई भुइँमा लडाएको देखाइएको छ।
गत वर्ष जुलाईमा देशका पूर्वप्रधानमन्त्री सिन्जो आबेको गोली हानी हत्या भएको थियो । सन् २०२२ को जुलाईमा देशको पश्चिमी भागमा सडकमा भाषण दिइरहेका बेला उनीमाथि आक्रमण भएको थियो ।एजेन्सी
