(ABC-Sanchar)
सिन्धुली । दुधौली नगरपालिका ४ मा बुधबार दिउँसो चट्याङ पर्दा मदन भण्डारी राजमार्गमा गुडिरहेका दुईवटा कार दुर्घटना हुँदा पाँच जना घाइते भएका छन् ।
स्थानीय दाताराम गौतमका अनुसार दुधौली नगरपालिका-४ को लक्ष्मीपुर र पचरुखीमा एकसाथ चटयाङ पर्दा उदयपुरतर्फ जाँदै गरेको वाग्मती प्रदेश वीएवी ५५३९ र प्रदेश ३– ०१–०३२ प ५८६० नं कारहरु अनियन्त्रित भई पल्टिँदा कारमा सवार पाँच जना घाइते भएका हुन् । घाइतेको उद्धार गरी सिर्थौली प्राथमिक स्वास्थ्य केन्द्रमा प्राथमिक उपचारपछि सिन्धुली अस्पताल र काठमाडौं पठाइएको इलाका प्रहरी कार्यालय डकाहाले जनायो ।
सोही बेलाको चट्याङका कारण स्थानीय दुईजना घाइते भएका छन् । उनीहरुको प्राथमिक स्वास्थ्य केन्द्र सिर्थौलीमा उपचार भइरहेको प्रहरीले जनाएको छ ।
