दाङ । भालुवाङ साउनको दोस्रो सातातिर लुम्बिनी प्रदेशलाई पूर्ण खोप सुनिश्चितता तथा दिगोपना घोषणा गर्ने तीब्ररूपमा तयारी गरिएको छ । प्रदेश अन्तरगतका सबै जिल्ला पूर्ण खोप सुनिश्चितता तथा दिगोपना घोषित भईसकेको हुँदा अब चाँडै प्रदेशलाई पूर्ण खोप घोषणा गर्ने तयारी भएको प्रदेश स्वास्थ्य मन्त्रालयले जनाएको छ ।
सोमबार अपरान्ह देउखुरीको सिसहनियाँमा स्वास्थ्य मन्त्रालयको आफ्नै सभाहलमा आयोजना गरेको पूर्ण खोप सुनिश्चितता तथा दिगोपना सम्बन्धि पत्रकारहरुसँग अन्तरक्रिया कार्यक्रममा सोकुरा बताइएको हो । लुम्बिनी प्रदेशका स्वास्थ्य मन्त्री दिपेन्द्र कुमार पुनले गतवर्ष कपिलवस्तु जिल्ला पूर्ण खोप सुनिश्चित जिल्ला घोषणा हुन नसके पनि यो पटक सबैले साथ सहयोग र सहकार्यमा प्रदेश पूर्ण खोप सुनिश्चित हुन लागेको जानकारी दिए ।
खोप अभियान सफल बनाउन निकै चुनाैतिपूर्ण रहेको हुँदा सचेतना अभियान अझ व्यापक बनाउनुपर्नेमा मन्त्री पुनले जोड दिए ।
प्रदेशका केही समुदायमा धार्मिक आस्था, घुमफिर गर्ने परिवार, सीमा क्षेत्रका नागरिक, कामदारका बालबालिकाहरु खोपको सहज पहुँचमा आउन अझै चुनौतिपूर्ण छ, उनले भने खोपको महत्त्व बुझ्न नसक्दा पनि समस्या छ । अर्कोतिर समाजको कारणले पनि चुनाैति छ ।
प्रदेश अन्तरगतका जिल्लामा यसैवर्ष असार महिनाको ६ गते रोल्पामा, १३ गते प्युठानमा, २५ गते पाल्पा र नवलपरासी पश्चिमममा, असार २६ गते गुल्मीमा, २७ गते रुकुम पूर्वमा, २८ गते दाङमा, २९ गते बर्दिया, बाँके र अर्घाखाँचीमा, असार ३० गते रुपन्देही र कपिलवस्तु जिल्लालाई पूर्ण खोप सुनिश्चितता तथा दिगोपना घोषणा गरिएको हो ।
प्रदेशलाई पूर्ण खोप सुनिश्चितता तथा दिगोपना घोषणाका लागि प्रमाणीकरण गर्न राष्ट्रिय खोप समन्वय समितिमा सिफारिस भईसकेको मन्त्री पुनले बताए । सो समितिबाट पूर्ण खोप सुनिश्चितताका लागि प्रमाणीकरण टोली परिचालन गरि अनुसूचि४,५,६,७,१० र १४ अनुसार सम्पूर्ण प्रकृया पूरा भएको पाईएमा पूर्णखोप प्रदेश घोषणाका लागि अनुमति पाउने छ । यो प्रकृया भए साउन महिनाको दोस्रो सातामै लुम्बिनी पूर्ण खोप सुनिश्चितता तथा दिगोपना प्रदेश घोषणा हुने उनको दाबी थियो ।
लुम्बिनी प्रदेश स्वास्थ्य मन्त्रालयका तथ्यांक अधिकृत मानबहादुर वलीका अनुसार, प्रदेशका १२ वटै जिल्लाका २९ सय ७५ खोप केन्द्रबाट ३१ सय ५९ सेसनमा खोप अभियान संचालन भएको थियो ।
जन्मेको १६ महिनादेखि ५९ महिनासम्मका बालबालिकाको पूर्ण खोपको अवस्था हेर्दा प्रदेशभर अझै १३० जना शून्य डोज खोप देखिएको छ । ड्रपआउट २३ सय ४३ जना रहेका छन् । रुकुम पूर्व, गुल्मी, पाल्पा बाहेक सबै जिल्लामा शून्य डोज खोप लगाएका बालबालिका रहेका तथ्यांक अधिकृत वलीले जानकारी दिए ।
नेपालमा हाल १३ वटा रोग विरुद्धको खोपहरु प्रदान गरिदै आएको छ । पूर्ण खोप भन्नाले १५ महिना उमेर भित्र राष्ट्रिय खोप तालिका अनुसार बिसिजी १ मात्रा, रोटा २ मात्रा, पोलियो ३ मात्रा, एफआईपीभी २ मात्रा, पिसिभि ३ मात्रा, डिपिटी ३ मात्रा, जेई १ मात्रा, दादुरा रुबेला २ मात्रा र टाईफाईडको १ मात्रा खोप लगाउनुपर्ने स्वास्थ्य सचिव डा। बासुदेव उपाध्यायले सल्लाह दिए ।
नेपालमा २०६९ सालबाट पूर्णखोप अभियान कार्यक्रमको शुरुवात गरिएको थियो। अछाम जिल्लाको तत्कालिन भागेश्वर गाविसलाई पहिलो पूर्णखोप गाविस घोषणा गरी सुरुवात भएको थियो ।
पूर्णखोप अभियानको शुरुवात लुम्बिनी प्रदेशमा पाल्पा र नवलपरासीबाट शुरु भएको थियो ।
लुम्बिनी प्रदेशले २०७० सालमा पाल्पा, नवलपरासी र क्रमशः अर्घाखाँची, गुल्मी, लगायतका सबै जिल्लाहरु घोषणा भई स्थानीयहरुले पूर्णखोप अभियानको अपनत्व लिई दिगोपना दिइरहेका लुम्बिनी प्रदेश मिति २०७९ भाद्र ३१ गते नेपालकै दोश्रो पूर्णखोप प्रदेश घोषणा भएको थियो ।
कार्यक्रममा प्रदेश स्वास्थ्य सचिव डा। बासुदेव उपाध्याय, स्वास्थ्य निर्देशनालयका निर्देशक डा. विनोदकुमार गिरीले खोप अभियानको अवस्था र रणनीतिका बारेमा विस्तृत रूपमा अवगत गराएका थिए ।
