पर्सा । वीरगञ्ज महानगरपालिकाले सिमलताल पहिरोमा परी हराइरहेकाे एञ्जल बसका चालक जवाहीर महतोको तीनजना छोराछोरीहरुको अध्ययनको सम्पूर्ण जिम्मेवारी लिने भएको छ ।
राष्ट्रिय समाचार समिति (रासस)ले मङ्गलबार ‘सिमलताल पहिरोः जवाहीरको परिवारमा परेको पीडा’ शीर्षकमा घरमुली जवाहीर हराएपछि सन्तानको पालनपोषण र शिक्षामा समस्या हुने विषयमा केन्द्रित रहेर समाचार प्रकाशन गरेको थियो । समाचार प्रकाशन भएको भोलिपल्टै अर्थात् आज बिहान वीरगञ्ज महानगरपालिकाका नगर प्रमुख राजेशमान सिंहले एञ्जल बसका चालक जवाहीर महतोको परिवारसँग भेट गर्नुभएको थियोे ।
जवाहिर मह्तोको बालबालिकाको अध्ययनको सम्पूर्ण जिम्मेवारी बिरगंज महानगरपालिकाले लिनेछ। नगरप्रमुख राजेश मान सिंहले बताउनु भयो जवाहीरको परिवारको जीविकोपार्जनकाे लागि आवश्यक व्यवस्था मिलाउन महानगरले योजना बनाएर कार्यान्वयन गर्छ । जवाहीरका एक छोरी र दुई छोरा छन् । महतोले चलाएको बागमती प्रदेश ०३ ०१-००ख १५१६ नम्बरको एञ्जल डिलक्स रात्रि बस गत शुक्रबार बिहानीपख भरतपुर महानगरपालिका-२९ सिमलताल नजिकै पहिरोमा परेर त्रिशूली नदीमा खसेको थियो । नगरप्रमुख राजेश मान सिंहले आजै एञ्जल बसमा सवार भएर दुर्घटनामा परेका अन्य परिवारका सदस्य हरुलाई पनि भेट गर्दै महानगर पीडित परिवारको साथमा रहेको बताउनु भएको थियो।रासस
