दाङ । देउखुरीको भालुवाङ नेपालगञ्ज बाट कपिलबस्तुको चन्द्राैटा तर्फ जाँदै गरेको लु १ ख ७२६४ नम्बरको खाली ट्रक आज शुक्रबार बिहान करिब साढे ७ बजेको समयमा भालुवाङको राप्ती नदी पुलमा दुर्घटना हुँदा ठुलो क्षति हुनबाट जोगिएको हो ।
ट्रकको अगाडीको दुबै तर्फको पटा भाँचिदा अन्यत्रित भई पुलमा ठोकिंदा उक्त दुर्घटना भएको जिल्ला ट्राफिक प्रहरी कार्यालय दाङका ट्राफिक प्रमुख प्रहरी निरीक्षक राजेश शाहीले जानकारी दिए ।
पुलबाट ट्रक खस्नबाट जोगिएपछि ठुलो दुर्घटना हुनबाट जोगिएको उनले बताए । उक्त दुर्घटनाबाट पुलको पूर्व तर्फको चार वटा रेलिङ्ग भाँचिएको जिल्ला ट्राफिक दाङले जानकारी दिएको छ ।
ट्रकमा चालक र सह—चालक मात्र रहेका थिए । दुर्घटनामा कुनै मानवीय क्षति भने नभएको प्रहरीले जनाएको छ । ट्रक अहिले पुलमै रहेको छ । केही महिना पहिले उक्त राप्ती पुलबाट यात्रु बाहक बस तल खस्दा करिब एक दर्जनबढीको ज्यान गएको थियो भने दर्जनौ घाइते भएका थिए ।
