काठमाडौं । उच्च अदालत पाटनको आदेशपछि महानगरले न्युरोडको जुद्ध सालिकदेखि इन्द्रचोकतर्फको बाटोमा सडक काट्न सुरु गरेपछि स्थानीयले विरोध जनाएका हुन् ।
स्थानीयहरुसँग समन्वय नगरिएको भन्दै दिउँसो डोजर पुगेपछि प्रदर्शनकारी उग्र बन्दा केहीबेर सुरक्षाकर्मी र नगर प्रहरीसँग धकेलाधकेल भएको थियो ।
प्रदर्शनमा सहभागीले महानगरका मेयर र सम्बन्धित अधिकारी छलफल गर्न आउनुको साटो डोजर पठाएर आफूहरुमाथि दमन गर्न खोजिएको बताएका छन् । उनीहरुले कलंकी, हाँडीगाउँ लगायत सहरका थुप्रै ठाउँमा फुटपाथ विस्तारमा मेयर बालेन्द्र शाहले ध्यान नदिई न्यूरोडमा मात्रै फुटपाथ विस्तार गर्न खोजेर आफूहरुलाई पेल्न खोजिएको आरोप लगाएका छन् ।
प्रदर्शनरत बबिन महर्जनले भने, ‘मेयरले न्यूरोडमा मात्रै फुटपाथ साँघुरो देख्नुभयो । हाँडीगाउँ, कलंकीलगायत ठाउँमा फुटपाथ देख्नु भएन । यहींको मान्छेलाई मात्रै पेल्नु भएन नि !’
पैदलमार्ग विस्तारको विरोधमा वडाध्यक्षसहित स्थानीय र व्यापारीहरुले शुक्रबार बिहानैदेखि सडक प्रदर्शन जारी राखेका छन् । जुद्ध सालिकदेखि दक्षिणतर्फको धर्मपथमा पनि फुटपाथ विस्तार गर्ने तयारी महानगरको छ । स्थानीयको मागमा समर्थन जनाउँदै काठमाडौं महानगरपालिका वडा नम्बर १८ का अध्यक्ष न्हुच्छेकाजी महर्जन, २१ का अध्यक्ष उदयचुडामणि बज्राचार्य, २२ का अध्यक्ष चिनीकाजी महर्जन, २३ का मचाराजा महर्जन पनि सडकमा आएका छन् । स्थिति भड्किन नदिन महानगर प्रहरी र नेपाली प्रहरी बाक्लो संख्यामा तैनाथ छन् । स्थिति भड्किन नदिन महानगर प्रहरी र नेपाली प्रहरी बाक्लो संख्यामा तैनाथ छन् ।
