पर्सा । चालू आर्थिक वर्ष २०८१/८२ को साउन र भदौ महिनामा भन्सारले ८ अर्ब ३९ करोड ४१ लाख १२ हजार मात्र राजस्व सङ्कलन गरेको छ, जुन गत वर्षको तुलनामा २६ करोड ७९ लाख ४३ हजार कम हो।
गत आव २०८०/८१ मा साउन र भदौ गरी दुई महिनामा ८ अर्ब ६५ करोड २० लाख ५५ हजार राजस्व सङ्कलन भएको थियो। भन्सार कार्यालयका सूचना अधिकारी सुशीलप्रसाद शर्माका अनुसार विगत दुई आर्थिक वर्षदेखि भन्सार कार्यालयले राजस्व लक्ष्य पूरा गर्न सकेको छैन। चालू आवको लक्ष्य पनि पूरा नहुने सङ्केत देखिएको छ।
सुक्खा बन्दरगाह भन्सार कार्यालयको तथ्याङ्क अनुसार आव २०७९/८० मा ६७ अर्ब ४३ करोड ८६ लाख ९४ हजारको राजस्व लक्ष्य रहेकोमा ४२ अर्ब ४० करोड २२ लाख ९३ हजार मात्र सङ्कलन भएको थियो, जुन लक्ष्यको ६२.८८ प्रतिशत मात्र हो। गत आव २०८०/८१ मा पनि लक्ष्यभन्दा डेढ अर्ब कम गरेर ६५ अर्ब ९४ करोड १ लाख २२ हजारको लक्ष्य राखिएको थियो। तर, त्यस वर्षमा ४७ अर्ब ३१ करोड १ लाख ९० हजार मात्र राजस्व सङ्कलन भएको थियो, जुन लक्ष्यको ७१.७५ प्रतिशत मात्र हो।
चालू आवको दुई महिनामा ८ अर्ब ३९ करोड ४१ लाख १२ हजार राजस्व सङ्कलन गरिएको छ, जुन लक्ष्यको ९३.९८ प्रतिशत हो।
यता, विदेशी मदिरा आयातमा भने वृद्धि भएको छ। वीरगञ्ज भन्सार कार्यालयका सूचना अधिकारी राघवलाल कर्णका अनुसार चालू आवको भदौसम्म २२ हजार ५०० लिटर विदेशी मदिरा आयात भएको छ, जुन गत आवको सोही अवधिमा आयात भएको २० हजार ९९८ लिटर भन्दा धेरै हो। यस आयातबाट चालू आवमा ४ करोड ३ लाख ६२ हजार भन्सार राजस्व सङ्कलन भएको उनले जानकारी दिए।
यसरी राजस्व सङ्कलनमा गिरावट भए पनि विदेशी मदिरा आयातको वृद्धि भन्सार कार्यालयको आर्थिक सङ्कलनमा केही हदसम्म टेवा पुगेको देखिन्छ।
