बाँके । देशको पश्चिमी भूभागमा सक्रिय पश्चिमी न्यूनचापीय प्रणालीको प्रभावले तराई-मधेसमा हुस्सु र कुहिरो लागेर जनजीवन प्रभावित भएको छ। गण्डकी, कर्णाली र सुदूरपश्चिमका पहाडी क्षेत्रमा आंशिक बदली भए पनि तराईका धेरै भूभाग हुस्सु र कुहिरोले ढाकिएका छन्।
मौसम पूर्वानुमान महाशाखाले शुक्रबार बिहान ६ बजे जारी गरेको बुलेटिनमा मधेस र कोसी प्रदेशका तराई क्षेत्रका जिल्लामा विगत केही दिनदेखि राम्ररी घाम नलागेको उल्लेख छ। यसले गर्दा दैनिक जीवन, स्वास्थ्य, कृषि, यातायात, र हवाई उडानमा समेत असर परिरहेको छ।
महाशाखाका अनुसार कर्णाली प्रदेशका उच्च पहाडी तथा हिमाली भूभागका केही स्थानमा हल्का हिमपातको सम्भावना रहेकाले सतर्कता अपनाउन आग्रह गरिएको छ। तराईमा घना हुस्सु र कुहिरो लाग्ने सम्भावना रहेकाले स्थानीयबासीलाई सावधानी अपनाउन अनुरोध गरिएको छ।
हुस्सु र कुहिरोको कारणले सडक र हवाई यातायातमा अवरोध सिर्जना हुनुका साथै जनजीवन कठिन हुँदै गएको छ। दैनिक कामकाज, विद्यालय, अस्पतालमा आवतजावत, र कृषि कार्यमा समेत कुहिरोले प्रभाव पारेको छ। यस्तो अवस्थामा विशेष सावधानी अपनाउन र आवश्यक परामर्श लिन महाशाखाले आग्रह गरेको छ।
तराई-मधेसका जनतालाई यस्तो प्रतिकूल मौसमको प्रभावलाई न्यूनिकरण गर्न सबै क्षेत्रबाट आवश्यक तयारी गर्नुपर्ने आवश्यकता महशुस गरिएको छ।
