दाङ । लमही चरा तथा जैविक विविधता विषय संरक्षण सम्बन्धि एकदिनका लागि दक्षता बढाउन तालीम दाङको -देउखुरी, लमहीमा हालै सम्पन्न भएकाे छ । समुदायमा आधारित विभिन्न संस्थाबाट सहभागीहरुलाई महत्त्वपूर्ण चरा तथा जैविक विविधता सम्बन्धि अत्यन्तै जानकारीमूलक प्रशिक्षण प्रदान गरिएको हो ।
उक्त क्षमता बढाउने प्रशिक्षणमा नेपाल पंक्षी संरक्षण संघ, काठमाडौंकाे आयाेजनामा दाङ-देउखुरी चुरे वन तथा पश्चिम राप्ती सिमसार क्षेत्रमा आप्रबासी चराहरूकाे संरक्षणका लागि स्थानीय सरकार र समुदायकाे संलग्नता नामक परियाेजना अन्तर्गत समुदायमा आधारित संस्थाहरूका प्रतिनिधिहरूलाई प्रदान गरिएको बताइन्छ ।
समुदायमा आधारित संस्थाहरूका प्रतिनिधिहरूलाई चरा र जैविक विविधता क्षेत्रको बारेमा जानकारी दिनुका साथै चरा संरक्षणमा अनि तिनीहरूको बासस्थान संरक्षणमा टेवा पुर्याउने उद्देश्यले यो कार्यक्रमको आयोजना गरिएको संघका परियाेजना अधिकृत भुपाल नेपालीले बताएका छन् । साथमा अधिकृत नेपालीले पंक्षी संरक्षण संघ, सञ्चालित परियोजना तथा महत्त्वपूर्ण चरा र जैविक विविधता क्षेत्र संरक्षण को विषयमा विस्तृत रुपमा प्रशिक्षण प्रदान गरेका थिए ।
कार्यक्रममा संघका अर्का परियोजना अधिकृत अमृत नेपालीले चराको महत्व र चराको पहिचान लगायतका विषयमा प्रकाश पारेका थिए । त्यसैगरी संघका अर्का परियोजना अधिकृत दिलिप चन्दले महत्वपूर्ण चराक्षेत्र र बसाईसराई गरी आउने चराहरूको विषयमा आफ्नो प्रस्तुतिकरण राखेका थिए ।
परिचालन सञ्चालन भएका दाङकाे देउखुरीमा राप्ती, गढवा, राजपुर गाउँपालिका र लमही नगरपालिकाका सामुदायिक वन समूहका प्रतिनिधिहरू, जैविक विविधता क्षेत्रमा काम गर्ने संघ संस्थाका प्रतिनिधिहरू र स्थानीय संरक्षणकर्मीहरू गरी सो प्रशिक्षण कार्यक्रममा झण्डै दुई दर्जन बढीको सहभागिता रहेको थियाे ।
