दाङ । भालुवाङ देउखुरीको राप्ती गाउँपालिका–२ लालमटिया टुडिखेल मैदानमा पुष २५ गतेदेखि सातौं राप्ती लुम्बिनी प्रादेशिक व्यापारिक, पर्यटन तथा कृषि महोत्सव सञ्चालन भएको छ । महोत्सवको तेस्रो दिन आइतबारका दिन चर्चित तथा लोकप्रिय गायक कृष्ण रेउले र गायिका अनु रानामगरले दर्शकहरुलाई आफ्ना गीतहरुमा नचाएर मनग्ये मनोरञ्जन दिएका छन् ।
गायक रेउले गित गाउनुमा जति खप्पिस छन्, दर्शकहरुलाई हँसाउनमा उत्तिकै चर्चित बनेका छन् । उनी जहाँसुकैको महोत्सवमा जाउन्, त्यहाँका दर्शक – श्रोता धित मरुञ्जेल हाँस्न पाउँछन् । आफ्नो सांगीतिक प्रस्तुतिसँगै कार्यक्रम सञ्चालक, अतिथि र दर्शकलाई पेट मिचिमिचि हँसाउन सफलता प्राप्त गरेका छन् । रेउलेको प्रस्तुतिले नहाँस्ने दर्शक – श्रोता कमै होलान् शायद ।
राप्ती उद्योग वाणिज्य संघ, भालुवाङले आयोजना गरेको महोत्सवमा गायक रेउलेले थुप्रै गीत मार्फत दर्शक र अतिथिहरुलाई नचाउन सफल भए । आज गाउँमा बिजुली चम्क्यो, झ्याउरे लगायतका गित गाउँदै दर्शकलाई मनोरञ्जन दिएका थिए ।
महोत्सवमा लोक दोहोरी गायिका अनु रानामगरले पनि दर्शकहरुलाई उत्तिकै नचाएकी थिइन् । उनले नौतुनाको रेल पुग्यो बम्बई, छम्मछ्मी नाच्ने हो जस्ता गीत गाएर उपस्थित जनमानसमा मनोरञ्जन प्रदान गरेकी थिइन् ।
एलिसा डान्स ग्रुप सहित स्थानीय कलाकारहरुले पनि आ–आफ्नो प्रस्तुति दिएर दर्शकहरुलाई मनोरञ्जन दिएका थिए ।
त्यसैगरी महोत्सवको चौथो दिन पुस २८ गते, सोमबारका लागि गायक बसन्त लम्साल, गायिका सम्झना रनपाल लगायतका कलाकारहरू आउने आयोजकले बताएको छ । उनीहरुसँगै महोत्सवमा गायक तथा उद्घोषक राजेश भण्डारी र साथमा एलिसा डान्स ग्रुपको पनि प्रस्तुति रहने बताइएको छ ।
