एजेन्सी । इरानमा बढ्दै गएको आर्थिक सङ्कटको विरोध गर्दै सुरु भएको सरकार विरोधी प्रदर्शन दुई हप्तामा देशव्यापी बनेको छ । अमेरिकी मानव अधिकार समूह एचआरएएनएका अनुसार प्रदर्शनका क्रममा हालसम्म ४९० प्रदर्शनकारी र ६८ सुरक्षा कर्मचारी गरी ५५८ जनाको मृत्यु भएको छ । करिब १० हजार प्रदर्शनकारी पक्राउ परेका छन् ।
अन्तर्राष्ट्रिय समाचार एजेन्सी रोयटर्सले एचआरएएनएको उक्त तथ्याङ्क सार्वजनिक गरे पनि स्वतन्त्र रूपमा पूर्ण पुष्टि हुन बाँकी रहेको जनाएको छ । इरानी अधिकारीहरूले प्रदर्शनलाई विदेशी शक्तिको उक्साहटमा भएको ‘दङ्गा’ भन्दै आएका छन् र आधिकारिक मृत्यु सङ्ख्या सार्वजनिक गरेका छैनन् ।
प्रदर्शन गत डिसेम्बर २८ मा राजधानी तेहरानको ग्राण्ड बजार क्षेत्रबाट महँगीविरुद्ध सुरु भएको थियो । सरकारले प्रदर्शनकारीहरूमाथि दमन गरेपछि चाँडै नै प्रदर्शन सरकार विरोधी नारा सहित देशका सबै प्रान्तका एक सय भन्दा बढी सहरमा फैलिएको अन्तर्राष्ट्रिय सञ्चारमाध्यमहरूले जनाएका छन् ।
