कपिलवस्तु । प्रहरीले रेष्टुरेन्टमा जुवा खेलिरहेको अवस्थामा साढे दुई लाख रुपैयाँभन्दा बढी नगदसहित ६ जनालाई नियन्त्रणमा लिएको छ।
पक्राउ पर्नेमा रूपन्देहीको कञ्चन गाउँपालिका–५ पिपरी चापाका ३५ वर्षीय दिलिप थापा, सोही वडाको भैसाही बस्ने ३२ वर्षीय कमल थापा र गौडी बस्ने ३३ वर्षीय दिपेन्द्र घर्ती मगर रहेका छन्।
यसैगरी, कपिलवस्तुको वाणगंगा नगरपालिका–१० वनकट्टीका ३५ वर्षीय अर्जुन चौधरी, सोही वडाको भावपुर निवासी तथा रेष्टुरेन्ट सञ्चालक ३५ वर्षीय दिनेश थारु र वाणगंगा नगरपालिका–३ भकतौलीका ३३ वर्षीय उमेश पोखरेल पनि पक्राउ परेका छन्। उनीहरूको साथबाट दुई लाख ५६ हजार २ सय ९० रुपैयाँ नगद बरामद गरिएको प्रहरीले जनाएको छ।
जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक (डिएसपी) रिपेन्द्रकुमार सिंहका अनुसार वाणगंगा नगरपालिका–१० भानपुरमा दिनेश थारुले सञ्चालन गरेको ‘रोयल सिटी कटेज एण्ड रेष्टुरेन्ट’ मा जुवा खेलिरहेको भन्ने गोप्य सूचनाका आधारमा पुस २७ गते साँझ करिब ८ बजे प्रहरीले छापा मारेको थियो।
पक्राउ परेकाहरूलाई जिल्ला अदालतबाट पाँच दिनको म्याद थप गरी जुवा सम्बन्धी मुद्दामा अनुसन्धान अघि बढाइएको डिएसपी सिंहले जानकारी दिए।
