बाँके । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय सुर्खेतको प्रमुखको रूपमा प्रहरी उपरीक्षक (एसपी) मुकुन्द रिजालले सोमबार औपचारिक रूपमा कार्यभार सम्हालेका छन्।
केही दिनअघि मात्र सरुवा भई सुर्खेत आएका एसपी रिजालले कार्यालयमा उपस्थित भई जिम्मेवारी सम्हालेसँगै मातहतका ट्राफिक प्रहरी कर्मचारीलाई स्पष्ट निर्देशन दिएका छन्। उनले ट्राफिक व्यवस्थापनलाई थप प्रभावकारी बनाउने, सवारी दुर्घटना न्यूनीकरण गर्ने र राजमार्गमा सुरक्षित यात्राको वातावरण सिर्जना गर्न विशेष जोड दिनुपर्ने बताएका छन्।
एसपी रिजालले ट्राफिक प्रहरीको आचरण, व्यवहार र व्यवसायिक निष्ठा अत्यन्त महत्वपूर्ण रहेको उल्लेख गर्दै नागरिकमैत्री सेवा प्रवाहलाई प्राथमिकतामा राखेर काम गर्न निर्देशन दिएका छन्। साथै उनले उत्कृष्ट काम गर्ने ट्राफिक कर्मचारीलाई प्रोत्साहन गर्ने र सेवा प्रवाहमा कुनै पनि प्रकारको लापरबाही सह्य नहुने स्पष्ट पारेका छन्।
उनले जिम्मेवारी सम्हाल्दै राजमार्ग सुरक्षालाई सुदृढ बनाउने र ट्राफिक व्यवस्थापनलाई थप व्यवस्थित र प्रविधिमैत्री बनाउने प्रतिबद्धता व्यक्त गरेका छन्।
