काठमाडौं । तेह्रथुमकी प्रधानाध्यापक तारादेवी खतिवडालाई जिल्ला अदालतले जातीय विभेदको आरोपमा ९ महिना कैद र ७५ हजार रुपैयाँ जरिवाना तोकेको छ। घटना भदौ ७ गते अठराईस्थित नाम्जाङ आधारभूत विद्यालयमा भएको थियो।प्रहरी र अदालतको अनुसार, प्रधानाध्यापक खतिवडाले तीजको दरखाने कार्यक्रममा सहकर्मी शिक्षिका एलिसा विश्वकर्मालाई “तल्लो जातले पकाएको भाँडामा ठुलो जातले खाना खान हुँदैन” भनी खाना पकाउने ठाउँमा जान रोक लगाएकी थिइन्। एलिसाले विगतमा पनि यस्तै विभेद भोगेकी थिइन् र यसपटक प्रमाणका लागि मोबाइलमा कुराकानी रेकर्ड गरी प्रहरीमा जाहेरी दिइन्। त्यसपछि प्रधानाध्यापक पक्राउ परिन् र अनुसन्धानपछि अदालतले सजाय सुनाएको हो।
