बाँके । जिल्ला प्रशासन कार्यालय बाँकेले आसन्न फागु पूर्णिमा (होली) पर्व, रमजान महिना तथा प्रतिनिधि सभा सदस्य निर्वाचन २०८२ लाई लक्षित गर्दै सामाजिक सद्भाव र धार्मिक सहिष्णुता कायम राख्न ७ बुँदे निर्णय सार्वजनिक गरेको छ।
प्रशासनले मुस्लिम समुदायलाई रमजान महिनाको शुभकामना व्यक्त गर्दै हिन्दु समुदायले मनाउने होली पर्व पनि मर्यादित र व्यवस्थित रूपमा मनाउन आग्रह गरेको छ। फागुन २१ गते हुने प्रतिनिधि सभा सदस्य निर्वाचन नजिकिँदै गर्दा मौन अवधिको पालना गर्न तथा होली पर्वलाई घरपरिवारमै सीमित राख्न अनुरोध गरिएको छ।
निर्णयअनुसार चाडपर्वका नाममा ध्वनि प्रदूषण नगर्न, उच्छृङ्खल गतिविधि नगर्न र सामाजिक सद्भाव खल्बलिने कुनै पनि कार्य नगर्न सबै पक्षलाई सचेत गराइएको छ। साथै, विवाह तथा अन्य कार्यक्रम आयोजना गर्दा पनि ध्वनि प्रदूषण नगर्न प्रशासनले आग्रह गरेको छ।
प्रशासनले निर्वाचन आचारसंहिता पूर्ण रूपमा पालना गर्न, निर्वाचन स्वच्छ, निष्पक्ष र भयरहित वातावरणमा सम्पन्न गर्न सबै राजनीतिक दल, उम्मेदवार र सर्वसाधारणलाई सहयोग गर्न आह्वान गरेको छ।
जिल्लाको विशिष्टता र धार्मिक विविधतालाई ध्यानमा राख्दै सामाजिक सद्भाव कायम राख्न स्थानीय तहमा सर्वदलीय तथा सर्वपक्षीय बैठक आयोजना गरी सहकार्य गर्न समेत अनुरोध गरिएको छ।
प्रमुख जिल्ला अधिकारीको हस्ताक्षरसहित जारी सूचनामा शान्ति, सद्भाव र सहिष्णुता कायम राख्न सबै नागरिकलाई सहयोग गर्न अपिल गरिएको छ।
