कोलम्बियाको दक्षिणी पुतुमायो विभागमा रहेको पुएर्तो लेगुइजामो क्षेत्रमा टेकअफ गर्ने क्रममा एक विमान दुर्घटनाग्रस्त हुँदा मृत्यु हुनेको संख्या ६६ पुगेको छ। साथै ४ जना हराइरहेको जनाइएको छ। अन्य दर्जनौं घाइतेहरूलाई नजिकको अस्पतालमा पुर्याइएको छ।
रक्षामन्त्री पेड्रो सान्चेजका अनुसार, विमान टेकअफ गर्ने साथ रनवेबाट करिब १.५ किलोमिटर टाढा खसेको थियो। विमान खसेपछि टुक्रा-टुक्रा भएको थियो र त्यसपछि आगलागी भएको थियो।
एएफपीकाअनुसार, यस दुर्घटनामा ५८ सैनिक, ६ जना वायुसेना कर्मचारी र २ जना प्रहरी अधिकारीको ज्यान गएको छ। यो दुर्घटना ग्रस्त सी-१३० हर्क्युलिस नामक सैनिक विमान हो।
उक्त विमान पेरुको सीमासँग जोडिएको पुतुमायो विभागको पुएर्तो लेगुइजामो शहरमा दुर्घटनाग्रस्त भएको हो। विमानमा कुल १ सय २८ जना सवार रहेको रोयटर्सले जनाएको छ।
जसमा ११५ जना सेना सवार थिए भने दुई जना प्रहरी अधिकारी थिए। त्यस्तै, विमानमा ११ जना चालकदलका सदस्य (वायुसेनाका सदस्य) हरु रहेका थिए। एजेन्सी
