काठमाडौँ । ललितपुर महानगरपालिकाले ‘वातावरण भ्यान’को शुभारम्भ गरेको छ। एक कार्यक्रमको आयोजना गर्दै बिहीवार महानगर प्रमुख चिरीबाबु महर्जनले सो कार्यक्रमको शुभारम्भ गरेका हुन् ।
वातावरण संरक्षण तथा सरसफाइ व्यवस्थापनलाई प्रभावकारी बनाउने उद्देश्यसहित सञ्चालनमा ल्याइएको यस भ्यानमार्फत महानगर क्षेत्रमा अनुगमन र कारबाहीलाई थप सशक्त बनाइने बताइएको छ।
यस अभियानमा वातावरण प्रहरीले महत्वपूर्ण भूमिका निर्वाह गर्नेछन्। वातावरण प्रहरीले खुला रूपमा बालिएका आगो निभाउने, प्लास्टिकजन्य वस्तु जलाउन रोक्ने, अत्यधिक धुवाँ फाल्ने सवारी साधन तथा उद्योगहरूको अनुगमन गर्ने जनाइएको छ।
साथै, जथाभावी फोहोर फाल्ने, ध्वनि प्रदूषण गर्ने, अव्यवस्थित रूपमा विज्ञापन टाँस्ने तथा रुखबिरुवा क्षति पुर्याउने कार्यमा कडाइका साथ कारबाही गरिनेछ महानगरको भनाइ छ।
तस्बिरहरुःनेपाल फोटो लाइब्रेरी
