दाङ । आज गंगा माध्यमिक विद्यालय, घोराही–२ रामपुरका माध्यमिक तह नेपाली विषयका शिक्षक रोशनी केसीलाई औपचारिक रूपमा विदाइ गर्दा मन असाध्यै भारी भयो ।
करिब सात महिना अघि हामी एउटै दिन यस विद्यालयमा सेवा प्रवेश गरेका थियौँ । छोटो समय भए पनि एउटै परिवारका सदस्यझैँ सँगै काम गर्ने, सिक्ने, हाँस्ने र विद्यालयका अनेकौँ सुख-दुःख बाँड्ने अवसर मिल्यो । त्यसैले आजको विदाइ केवल एउटा औपचारिक कार्यक्रम रहेन, मनका धेरै सम्झनाहरूलाई एकैचोटि झस्काउने क्षण बन्यो ।
उहाँ आज सम्भावनाको नयाँ खोजीमा नयाँ यात्रातर्फ अघि बढ्नुभएको छ । जीवनको बाटो यस्तै रहेछ । कहिले मिलनका फूलहरू फुलाउँछ, कहिले बिछोडका पीडाहरू पनि सुम्पिन्छ । तर असल मानिससँग बिताएका क्षणहरू कहिल्यै ओझेल पर्दैनन् । ती सम्झनाका रूपमा सधैँ मनमा जीवित रहिरहन्छन् ।
रोशनी म्याम, तपाईंको आगामी यात्रा सफल, सुरक्षित र उपलब्धिमय बनोस् । जहाँ रहनुहुन्छ, त्यहीँ आफ्नो ज्ञान, क्षमता र सरल व्यक्तित्वको उज्यालो फैलाइरहनुहोस् । तपाईंका सबै सपना साकार हुन् भन्ने हार्दिक शुभकामना ।
भेट संयोग थियो । विदाइ अनिवार्य सर्त बन्यो । तर सम्बन्ध दूरीले होइन, सम्झनाले बाँधिरहन्छ ।
हार्दिक शुभयात्रा । उज्ज्वल भविष्यको मंगलकामना ।
