काठमाडौं । माइक्रोको छतमा पाठो राखेको विषयमा रास्वपा सांसद आशिका तामाङसँगको भेटपछि भाइरल बनेका सह-चालक नारायण थापाले आफ्नो धारणा सार्वजनिक गरेका छन्।
उनले भनेका छन् –
> “म पनि पुरुष मान्छे हुँ, उहाँ महिला हुनुहुन्छ। उहाँले त्यसरी गाली गर्दा मलाई पनि रिस उठ्न सक्थ्यो। मैले पनि उहाँले जस्तै जवाफ फर्काएको भए त्यहाँ झगडा हुन सक्थ्यो, लफडा हुन सक्थ्यो। तर उहाँलाई मैले दिदीबहिनीको रूपमा हेरेँ। उहाँ महिला हुनुहुन्छ, त्यसमाथि नेता तथा सांसदजस्तो जिम्मेवार पदमा हुनुहुन्छ। त्यसैले मैले उहाँलाई सम्मान गरेको हुँ।”
तर सांसद तामाङले पैसा फ्याँकेको कुरामा भने आफूलाई चित्त नबुझेको उनले बताएका छन्।
> “तर एउटा कुरा चाहिँ मलाई चित्त बुझेन। उहाँले त्यसरी पैसा फ्याँक्नुभयो। हामी गरिबका छोराछोरी हौँ। मेहनत र पसिना बगाएर, हात जोडेर दुःख गरेर कमाएको पैसा खान्छौँ। कसैले त्यसरी पैसा फ्याँकेर ‘ल, पैसा चाहिएको छ भने टिपेर लैजा’ भने पनि हामी त्यसरी पैसा उठाएर लैजाने खालका होइनौँ। तपाईंलाई पैसा दिनै मन थियो भने हातमा दिए पनि हुन्थ्यो नि। त्यसरी पैसा फ्याँकेर अपमान गर्नुपर्ने थिएन।”
साथै उनले उक्त गाडी आफ्नो नभएको पनि प्रष्ट पारेका छन्।
> “त्यो गाडी मेरो होइन, साथीको हो। हामी ड्राइभर पेसामा लागेपछि साथीभाइ त भइहाल्छन् नि। गाडी साथीको हो, मेरो होइन। त्यो गाडीको स्टाफ पनि त्यहाँ हुनुहुन्थ्यो कि भन्ने लागेर मैले खोजेँ, तर कतै देखिनँ। नदेखेपछि यो गाडी कसको हो भनेर खोजिरहेको थिएँ। त्यही क्रममा उहाँ त्यहाँ आउनुभयो र त्यसपछि त्यो घटना भयो।”
यसअघि सांसद आशिका तामाङले बिरामी पाठोलाई माइक्रोको छतमा बाँधेर लैजान लागेको देखेपछि त्यसलाई तल झार्न आग्रह गर्नुभएको थियो। उक्त घटनाको भिडियो भाइरल भएपछि सामाजिक सञ्जालमा दुई थरी प्रतिक्रिया आइरहेका छन्।
