काठमाडौं माघ २१ गते राति ३ बजे ललितपुरको श्रीबहालस्थित एक सुनचाँदी पसलमा एक करोड बढीको गरगहना चोरी भयो । पसल फोडेर चोरी गरेको घटना राति कसैले चाल पाएनन् ।
बिहान सञ्चालक जब पसलमा पुगे, उनले ताला फोडेर ‘सेफ’ लुटिएको देखे । ‘सेफ’ मै थियो, पसलको ९३ तोला सुन, २६५ तोला चाँदीलगायत एक करोड बढीको धातु । उनले प्रहरीलाई खबर गरे ।
लुटपाटको सूचनापछि महानगरीय प्रहरी प्रभाग पुल्चोक, अपराध शाखा ललितपुरको टोली घटनास्थल पुग्यो । लुटेराले सबै सामान लगिसकेका थिए । त्यतिबेलै प्रहरीको सहयोगी बन्यो, पसलभित्रै रहेको सीसीटीभी क्यामेरा ।
महानगरीय प्रहरी परिसर ललितपुरका एसएसपी टेकबहादुर राई भन्छन्, ‘‘सीसीटीभीमा सबै दृश्य कैद थिएन । लुटेराहरू ‘प्रोफेसनल’ रहेछन् । सकेसम्म अनुहार नदेखिने गरी लुटेका थिए । तर झन्डै २० सेकेन्डको भिडियो नै कैद भएको रहेछ ।’’
प्रहरीसँग घटनाको अनुसन्धान गर्ने पहिलो माध्यम बन्यो, सीसीटीभी क्यामेरा । दृश्य त थियो तर व्यक्ति पहिचान गर्न गाह्रो थियो, प्रहरीलाई । अनुसन्धानमा संलग्न एक प्रहरी अधिकारीले भने, ‘‘सीसीटीभीसँगै हामीले २ बजे आसपासको समयमा त्यो क्षेत्रमा ‘एक्टिभ’ भएका मोबाइल नम्बरको अनुसन्धान सुरु गर्यौ । त्यसबाट केही शंकास्पद नम्बरबाट अनुसन्धान अगाडि बढ्यो ।’’ एक साताको बीचमा प्रहरीले सूचना संकलन गर्ने र अनुसन्धान कार्यलाई निरन्तरता दियो । त्यसक्रममा लुटेरा समूह गाडीमा आएको पत्ता लाग्यो ।
प्रहरीले बुधबार काठमाडौंको सतुंगल र थानकोटबाट लुटिएका गहनासहित तीन जनालाई पक्राउ गर्यो । पक्राउ पर्नेमा सुरज पोद्दार, चन्दन पोद्दार र रवि पोद्दार छन् । पक्राउ परेकाहरू सबै भारतीय हुन् । उनीहरू आफन्त भएको खुलेको छ ।
एसएसपी राईका अनुसार लुटपाटमा ७ जनाको समूह थियो । चारजना फरार छन् । उनीहरूले गहना थानकोटमा आफू बस्दै आएको डेराको आसपासमा फोहोरमुनि लुकाएका थिए । सेफ भने सतुंगलस्थित खोलाको फोहोरमुनि गाडेका थिए । एसएसपी राईले भने, ‘‘सेफ, चोरी गर्न प्रयोग गरिएको गाडी र गहना सबै बरामद गरेका छौं । ठूलो मात्रामा भएकाले उनीहरूले बेच्न भएका पाएका रहेनछन् । लुटपाट भएको सबै गहना सुरक्षित पाइएको छ ।’’
ललितपुरबाट लुटेको करोडको सुनसहित ३ भारतीय पक्राउ
उनीहरू दिउँसोको समयमा कवाड संकलन गर्दै आएका थिए । कवाड संकलनको बहानामा रेकी गर्ने, वरपरको अवस्था बुझ्ने र राति चोर्नेे गरेको अनुसन्धानबाट खुलेको राई बताउँछन् । उनीहरू अन्य घटनामा पनि जोडिएको नजोडिएको अनुसन्धान गरिरहेको प्रहरी बताउँछ । पछिल्लो समय उपत्यकामा भारतीय चोर सक्रिय रहेको भन्दै प्रहरीले सतर्कता अपनाउन बेला–बेला आग्रह गर्दै आएको छ ।

सम्बन्धित

पुर्व मन्त्री दिपक गिरीलाई दाङमा भब्य स्वागत

पुर्व प्रधानमन्त्री झलनाथ खनालको उपचार खर्च सरकारले दूतावास मार्फत दिने

राष्ट्रपतिलाई महाअभियोग लगाएर देखाउन महेश बस्नेतको चुनौती

बर्दियामा नुहाउन गएका ३ जना बेपत्ता खोजतलास जारी

काठमाडौं बल्खुमा ट्राफिकको नयाँ भवनको शिलान्यास गर्दै ट्राफिक प्रमुख :भट्टराई

ब्राउन सुगर सहित सलमान खान, पक्राउ