काठमाडौं । भारतबाट पेट्रोलियम पदार्थको मूल्य बढेर आए पनि नेपालमा हालकै मूल्य यथावत् राख्दा पाक्षिक रूपमा ३ अर्ब २० करोड रुपैयाँभन्दा धेरै घाटा हुने नेपाल आयल निगमले जनाएको छ।
इन्डियन आयल कर्पोरेशनबाट हिजो बुधबार पेट्रोलियम पदार्थको मूल्य बढेर आए पनि नेपालमा नबढाइएको निगमले विज्ञप्तिमार्फत जानकारी दिएको हो।
भारतबाट मूल्यवृद्धि भएर आए पनि नेपालमा हालकै मूल्य काय राख्दा निगमलाई पाक्षिक रुपमा ३ अर्ब २० करोड ३८ लाख रुपैयाँ घाटा हुने निगमले जनाएको छ।
भोटेकोसीमा आएको असाधारण बाढीपहिरोका कारण सिर्जित परिस्थिति, आउँदै गरेका चाडपर्व तथा उपभोक्ताको हितलाई मध्यनजर गरेर मूल्य यथावत् राखिएको निगमले बुधबार राति जारी गरेको विज्ञप्तिमा उल्लेख छ।
निगमले विज्ञप्ति जारी गर्दै असोज १४ गते इन्डियन आयल कर्पोरेशनबाट नयाँ खरिद मूल्य प्राप्त हुँदा पेट्रोलमा प्रतिलिटर २० रुपैयाँ ४४ पैसा, डिजेलमा २० रुपैयाँ २१ पैसा, मट्टिलेटमा १५ रुपैयाँ ९६ पैसा र हवाई इन्धनमा प्रतिलिटर १८ रुपैयाँ ६६ पैसा बढेर आएको जनाएको हो।
त्यसैगरी खाना पकाउने ग्यासको भाउ प्रतिसिलिन्डर ८१ रुपैयाँ ३२ पैसा बढेर आए पनि पनि हाललाई मूल्य यथावत राखिएको निगमले जनाएको छ।
निगमका अनुसार मूल्य यथावत राख्दा पेट्रोल, डिजेल तथा मट्टितेलको मूल्य पहिलो वर्गका क्षेत्रमा प्रतिलिटर १९७ रुपैयाँ ५० पैसा, दोस्रो वर्गमा १९९ रुपैयाँ र तेस्रो वर्गमा २०० रुपैयाँ कायम रहने छ।
पहिलो वर्गमा चारआली, विराटनगर, जनकपुर, अमलेखगन्ज, भलबारी, नेपालगन्ज, धनगढी र वीरगन्ज छन्। दोस्रो वर्गमा सुर्खेत र दाङ तथा तेस्रो वर्गमा काठमाडौँ, पोखरा र दिपायल लगायत छ्न ।
